Nizan khan Bungkawn Community Hall-ah Bungkawn Branch YMA buatsaihin zirlai ti thate chawimawina hun hman a ni a. School Education changtu Parliamentary Secretary Pu Joseph Lalhimpuia’n a hmanpui.
Pu Joseph Lalhimpuia chuan Bungkawn Branch YMA-in kum 10 zet zirlai ti thate chawimawina hun an buatsaih thei chu chhuanawm a tih thu leh hemi atana lawmman thawhtute thahnemngaihna chu chhuanawm a tih thu a sawi a. Mizoram hmun hrang hrangah hostel tha leh rin tlak kan neih theih nan leh mumal zawk leh fel fai zawka a kal theih nan sawrkarin hostel rule siamin, Gazzette-ah a chhuah tawh a. Zirna tha (quality education) a awm theih nan high school leh middle school-ah zirtirtu lak dawnin 30-34% chu Science leh Mathematics zirtirtu atan la turin ruahmanna siam a ni a, chumi atan chuan qualification pawh a hran siam tura tih a ni bawk, a ti. Kumin kum tira middle school zirtirtu mi 102 lak zinga mi 34 chu Science leh Mathematics zirtirtu tur bik an ni a. Chu chu Mizoramin middle school-a Science leh Mathematics zirtirtu kan neih hmasak ber a ni tiin, sawrkar high school-ah Science leh Mathematics zirtirtu tur pawh lak theih thuai beisei a ni, a ti bawk.
Parliamentary Secretary chuan zirlai pass tharte chu taima taka zir chho zel turin a chah a. Lehkha thiam tak pawh nungchang uluk lo leh ruihtheihthil lama tlan chu an hlawhtling tak tak thei lo tiin, Pathian tih chung leh nu leh pa thu awih a, nungchang tha taka an nun hmang chho turin a chah a. Chu chu hlawhtlinna thlen a, dinhmun sang taka hlang kai theitu a nih thu a sawi.
Zirlai ti thate chawimawina hun hi Branch YMA Treasurer Pu H.Vanlalthlana’n a kaihruai a, Branch President Pu H.Lalsawmliana’n fuihna thu a sawi bawk. Pu Joseph Lalhimpuia hian Bungkawn Branch YMA hnenah hian thingpui lumna senso atan sumfai a pe bawk.
Bungkawn veng chhunga HSLC & HSSLC distinction leh first division-a pass thar mi 29 hnenah hian lawmpuina citation leh Pu Remkunga Dictionary hlan an ni a. Pu Remkunga Dictionary hi Bialtu MLA Pu Vanlalzawma’n a pek a ni. He hunah hian AMC Ward XV Councillor Pi Zodinpuii, Local Council, MHIP hruaitute, School Education Department officer-te leh zirlai nu leh pate an tel tha hle a ni.
