Parliamentary Secretary Pu Lal Thanzara chuan MHIP Day vawi 37-na chu vawiin khan Electric Veng YMA hall-ah Electric Veng Mizo Hmeichhe Insuihkhawm Pawl hmanpuiin no 10 dozen a pe. MHIP Day-ah hian Electric Veng chhunga Tiranga leh Gutkha product an mankhawm Rs. 66,066.66 man zet chu halralin Khuallian leh bialtu MLA Pu Lal Thanzara nupui Pi Zohmingthangi'n halna mei a dep kai bawk a. Electric Veng MHIP hian MHIP Day lawmna atan hian an veng chhunga a mamawh apiang tan Free Clinic an buatsaih a; Gyneacology, Cardiology, Medicine, ENT leh Pediatric thiam doctorte'n damlote a thlawnin an en a ni.

Khuallian, Pu Lal Thanzara chuan Electric Veng MHIP (EMHIP) in doctor thiamte sawma Free Clinic buatsaiha MHIP Day hman nachang an hria chu lawmawm a ti tih a sawi a. Mizote hian kan taksa tana tangkaina nei lo leh zuk leh hmuamah te kan insum theih loh lutuk avangin natna leh harsatna tamtak kan insiam chawp thin a ti a, Free Clinic avanga lawm mai lovin taksa hrisel lohna kan insiam chawp phahna thin kan chin tha lo te kan sim a hun tawh a ni a ti bawk. Chanchin tha avanga Mizo hmeichhiate dinhmun a lo that sawt thu sawiin Kohhrana rawngbawlnaah pawh hmeichhiate rawngbawlna bik - Buhfai Tham te hian hmun pawimawh tak a luah a ni a ti a. Tunlaiah India ram chhung leh khawvela ram hrang hrangah hmeichhiaten ram rorelna dinhmun pawimawh tak tak an luah tih sawiin hmeichhiaten an neih hriatthiamna hian ram rorelna a hruai ngil thin a ni a ti a. Chhungkuaa bultan a fuh loh avangin ram leh hnamin harsatna tamtak a tawk thin tih sawiin MHIP member kalkhawmte chu Kristian chhungkaw pawimawhna hre thara ram leh hnam tana ke pen turin a fuih a ni.

Electric Veng MHIP ten MHIP Day an lawmna hi Pi Lalnuntluangi, President, EMHIP-in a kaihruai a, kum 2011-2013 chhung atana MHIP Kumpuan thupui "Mizo Hmeichhe Nunmawi Chhawmnun" chungchanga MHIP Hqrs President MHIP Day thuchah chhiarchhuah a ni bawk. EMHIP ah hian member 1796 an awm mek a ni.