Mizo Academy of Letters (MAL) in kum 2011 atana Book of the Year-a an thlan ‘Zodinpuii’ (Tv. Lalchhantluanga ziah) behchhana film siam ‘Zodinpuii’ tih chu vawiin khan Pu Lal Thanzara, Parliamentary Secretary to Chief Minister chuan Vanapa Hall-ah a thlangzarh.
Pu Lal Thanzara chuan Visual arts kan tih mai - film, lemziah leh thil ker hi khawvelah a thang nasa a, Mizoramah pawh hemi lam, a bik takin film ah hian a buaipuitu leh mipui pawh kan tuihal hle a ni, a ti a. Mizoram in heng thilah te hian hma kan sawn ve theih nan leh a buaipuitu leh a tuimi ten mi dang anga thiamna an neih ve theih nan Sawrkarin in visual arts tan token allocation cheng nuai 20, film leh painting leh a kaihhnawih tan nuai 10 ve ve a dah anih thu a sawi a. Token allocation hmang hian tha taka bul tan tum a ni, tiin, hemi atan hian roadmap changtlung tak film lama tui mite hmakhua ngaihtuahin ruahman mek anih thu a sawi lang bawk.
Pu Lal Thanzara chuan Film phei hi cu Mizoram tan thil thar tak mai anih thu sawiin a huang pawh a zau hle a ni, tiin, kawng tin reng ah hmasawnna tur tam tak a awm thu a sawi.
Film peng hrang hrang – direction, editing, scripting, camera, costume design, lighting & sound ah te training leh workshop a tam thei ang bera kan neih te a pawimawh dawn a tiin Censorship, copyright leh piracy lamah pawh kan in zir a tul hle dawn a ni, a ti bawk.
Film tlangzarhna inkhawm hi Pi Louis Hauhnar, he film Co-Producer chuan kaihruaiin Film Report chu film producer Pu C. Hmingthangvunga’n a pe a ni. He film hi Mizoram hmun hrang hrangah leh phai lamah te shooting neih niin a siam nan hian thla li (4) chuang hret hman a ni a. Sum leh pai, tha leh zung tam tak seng a, film hi siam anih avangin film buatsaihtu te hian mipui te chu film hi copy leh write lo turin an ngen a ni.
