National Day of Mathematics December ni 22 a neih tur chu remchan zawkna avangin vawiin khan SCERT Auditorium, Chaltlangah hman a ni a, Education Minister Pu Lalsawta’n a hmanpui.
Lalsawta chuan Mathematics hi Mizo zirlai ten subject harsa leh huphurhawm a kan ngaihna hi bansan a tul, a ti. Minister chuan Mathematics subject hi zirna kawnga mutan lian tak nia a ngaih thin thu leh a tel lo pawh hian hlawhtlinna thui tak neih theih tho nia a hriat thin dan te chu sawichhuakin tunah erawh chuan he subject pawimawhna leh zirna peng hrang hrangah pawh thiam ngei ngei tul a nih zawk zia a hmuh thu a sawi a. Chuvangin zirlai te tana a nelawm thei ang ber tura zirlaibu buatsaih leh chhawp chhuah a tulzia hriain kum thar atang chuan Mathematics zir dan thar, elementary school-ah hman tan a nih tur thu a puang a ni.
Kumin 2012 hi India Prime Minister Dr Manmohan Singh chuan Indian Mathematician ropui Srinivasa Ramanujan-a hriatreng nan National Year of Mathematics-ah a puang a, a pianchamphaphak pualin December 22 hi National Mathematics Day-ah a puang nghe nghe a ni. Mizoram-a Mathematics zirna in hma a sawna, ram dangte ruala ke a pen ve theihna a nih beiseiin vawiin khan he ni hi hman a ni a. Mizo te zinga Mathematics subject-a Master Degree (MSc) leh Doctorate degree nei hmasa ber, Dr LN Tluanga chu vawiinah hian chawimawina Pioneership Award hlan a ni.
Dr LN Tluanga hian Mizo zingah hmasa ber nihna dinhmun engemawzat a nei a, chungte chu: University Post Graduate Dept. a lecturer hmasa ber (Mathematics, Gauhati University 1967), Education Director hmasa ber, tuipuiral (overseas) a missionary hmasa ber, Mizo zinga India leh International huapa missionary pawl hruaitu hmasa ber niin pawl hrang hrang dintu Founder President nihna a neih nual bakah vawiin hun buatsaihtu Mizoram Mathematics Society President hmasa ber a ni bawk.
Mathematics Day lawmna Education Department leh Mizoram Mathematics Society te buatsaih hi SCERT Director Pi Malsawmthangi’n a kaihruai a, Mizoram Mathematics Society Vice President J Lalvohbika’n keynote address a sawi a. He hun hmang tur hian Mizo zinga zirna kawnga sulsutu langsar engemawzat bakah MLA Col.ZS Zuala te pawh an tel a ni.
