Transport Minister Pu PC. Zoram Sangliana chuan, Zoram mipuite hian thu dik belhchian dawl kan chhut thiam a tul a. Lal duh hrim hrim vanga thu awmze neilo hmanga mipui tih chi ai a hun tawh lo a ni, a ti.

He thu hi vawiin khan a bial chhung Pangbalkawn, Meidum, Chhimluang leh Bairabi ahte a sawi a. Mipui te chu thu lawilo hmanga in chirh thehna laka inthiar fihlim turin a chah a. Tunlai khawvel hi a changkan tawh avangin Media thiltih theihna chak tak Internet te atangin thudik hi hailanin a awm ta zel a ni, Pu Ramsanga chuan a ti a ni. Mipui ten in chhut fo tura ka duh chu politician te hian kan tihtur kan duan Manifesto kan ti hlawhtling em, kan thutiamah kan ding em tih hi a ni, Minister chuan a ti a. Tuna kan sawrkar a lo pian dawn khan NLUP kan kalpui ang kan tih kha mi tamtakin min nuihzat a. Amaherawhchu min hriat angin kan sawrkar veleh Loneitu leh Mirethei pualin Budget dah a lo ni ta a. Hei hi vawiin ni thlengin chak takin kan kalpui ta mawlh mawlh a nih hi, a ti bawk a ni.

Pu PC Zoram Sangliana chuan heng a bial chhung khaw pali a tlawhnaah te hian inthlan laia amah thlawptu leh vawiin thlenga a thawhpui mi rinawm nia a hriatte hnenah Krismas thilpek a hlan hlawm a. Hmel inhmuin inbe em em lo mah ila, rinawm taka kan thawh hona hi a hlu ka ti a ni, Pu Ramsanga chuan a ti a ni. Khaw pali ahte hian Krismas leh kumthar hlim taka hmang tura duhsakna hlanin a thawhpui mi 365 te hnenah Shawl mawi tak a pe vek a ni.

Pangbalkawn, Meidum leh Bairabi khawlaia chhit turin Street Light CFL Pu PC Zoram Sangliana chuan a pe bawk a. Pangbalkawn hnenah 10, Meidum 10, leh Bairabi hnenah 15 a pe a. Khawtlang hruaitute an lawm hle a ni.

Minister hi a nupui Pi Lalthlamuani’n a tawiawm a ni.