Vawiin khan Health, Minor Irrigation leh Information & Communication Technology Minister thar Pu Lal Thanzara chuan ATI Auditorium, New Secretariat Complex-ah Mizoram Secretariat Service Association (MSSA) General Conference vawi 9-na a hmanpui. MSSA inkhawmpui chawhma session hi an pawl President Pu Lalrammawia’n kaihruaiin, Pi C. Zothankimi chuan hunserh a hmang a, an pawl General Secretary Pu F. Lalrinawma chuan report tawi a pe bawk a ni.

Pu Lal Thanzara chuan Sawrkar Laipuiin sawrkar hnathawk tih tlem ‘downsizing’ a kalpui avangin Mizoramah pawh engemaw tih hunlai atanga kalpui anih tawh avang tein hna hmuh a har a, chuvangin Sawrkar hnathawk te hian an vanneihzia an chhut ngun fo a tul thusawiin mahni hlawh mil in hna kan thawk em tih te pawh inzawh nawm fo a tha a ni, a ti. Mahni hna thawk tha peih lo chuan mipui leh a chhawrtu Sawrkar an zah lo a, chung mite chu inbih chiang turin a duh thu a sawi bawk.

Mizoram chu state pachhe berte zing a ami anih thu leh dehchhuah neilo anih thu te sawiin Pu Lal Thanzara chuan hemi avang hian Sawrkar chuan a hnathawkte duat theih chin a nei tih hriat a tha a ni, a ti. Chutih rual chuan pawl emaw, service pakhat duhsak bik neilo a, a rual khai thei ang bera a hnathawkte enkawl chu Sawrkar tum ber a ni a ti bawk. MSSA officer kalkhawmte chu mahni hmasialna dahbo a, kan zavaia thatna tur leh midangte tana malsawmna ni theuh turin Minister hian a chah bawk a ni.

Mizoram Secretariat Service chu sawrkar hnarkaitu pawimawh tak a ni a tiin Pu Lal Thanzara chuan Sawrkar thar nen kum thar 2014 a tha taka bul tan tur a inpuahchah leh nghal turin a sawm. File kal rei lutuk chu a vei thu sawiin Pu Lal Thanzara chuan hemi thil ah hian ruahmanna tha zawk zawnpui turin a sawm bawk a ni.

Chawhnu session hi Pu B. Zahmuaka, Vice President chuan a kaihruai a, he hunah hian Pu T.Sangkunga, MLA leh MSSA President lo ni tawh bawk chuan fuihna thuchhah a sawi a, an Pawl Member pathum Pension a chhuak te – Pu T. Sangkunga, Pi Lalthanmawii leh Pu A.K. Roy te thlahna hun an hmang bawk. Chawhnu session khan Pawl hruaitu thlanna a nei a, inthlanna hi Mizoram Journalists’ Association te chuan an buaipui a ni.