Parliamentary Secretary Pu Lal Thanzara, Mizoram Football Association President ni bawk chuan vawiin khan ni 4 awh tur College hrang hrang te Football inelna Oil India-MSU Cup Aizawl Sipai Lammual-ah a hawng.
Pu Lal Thanzara chuan zirlaibu pawna thiam thil sports leh thildang te hi zirlaibu tlukin a pawimawh tiin mihring puitlinga chherchhuak tur chuan lehkhazir ngawr ngawr hi a tawk lo, a ti. Mahni inchhungkhur, college, khawtlang leh kohhrana awmdan mawi an zir te khelmualah a taka lanchhuahtir tura fuihin infiammi dik tak, sportsmanship thinlung pua inkhel turin a chah a. Pu Lal Thanzara chuan a thiam leh tui te tan Football-ah eizawnna kawng zau takin a inhawng tiin hlawhtling tur erawh chuan tha leh thiamna piahlamah insumtheihna a pawimawh a ni, a ti bawk. MSU ten thahnemngai taka zirlai te hmasawnna tura ke an pen chu fakawm a tih thu a sawi a, Technical Scholarship leh Book Grant pawh pechhuak tur a tihfel thuai tum a ni, a ti.
Oil India- MSU Cup hawnna inkhawm hi Organising Committee Vice Chairman C. Lalrosanga’n a kaihruai a. Organising Committee Chairman P.C. Lalrinhlua pawhin thu sawiin MSU Gen. Hqrs. Asst. General Secretary Lalremruata Chhangte chuan report a pe.
He tournament-ah hian Aizawl khaw chhung College sawm-Hrangbana College, Aizawl College, Zirtiri Residential Science College, J.Thankima College, Johnson College, Aizawl West College, Aizawl North College, T. Romana College, Pachhunga University College leh Mizoram University te bakah Aizawl khaw pawn atangin Govt. Kolasib College te an tel. He Tournament a Champion Team te chuan Trophy, medal leh cheng 50,000 an dawng anga , Runner-up in trophy, medal leh cheng 30,000 an dawng thung ang. June ni 8 ah Tournament hi khar a ni ang.
