Vawiin khan Pu Lal Thanzara, Parliamentary Secretary chuan Electric Veng a Power & Electricity Engineer-in-Chief Office building a hawng.

Pu Lal Thanzara chuan tun thlenga P&E department, department lian ber in anmahni building a lo la nei lo pawi a tih thu sawiin building tha zawk nei thuai turah ka ngai a ti. Tunah 70 MW power kan mamawh laiin kan mamawh phuhruk mai piah lamah P&E department a Engineer te hian hralhchhuah tham power siam an tumin rim takin hna an thawk mek a ni tiin, Power Department Engineer te chungah lawm thu a sawi. Kum thar ah office building tha tak sak chhunzawm thei turah a ngaih thu leh corruption laka fihlim ber department ni turin P&E Department officer te a fuih bawk.

Er. Lalrinkima, Sr. Executive Engineer in Technical Report pe in E-in-C (P&E) office hi peihfel a nih thlenga senso ngai zat tur estimate chu Rs. 201.00 lakh a ni a. July 2011 khan sak tan niin tunah hian 70 % vel zawh a ni tawh. Sak zawh vek anih hun chuan office luah tur area chu 1669.25 Sq.m a ni dawn a, tunah hian 1184.50 Sq.m luah rih a ni.

Nakum March 2012 hian a nih dan ang tur thlap a zawh hman tum a ni. He office building hi departmental work a thawh a ni. Mizopa chhiar ah chhawng 3 (thum) a sak tur a niin tunah hian chhawng 2 (hnih) (second floor) chin luah rih phawt a ni bawk.

Tun dinhmun thleng a, senso zat chu Rs. 107.50 lakh a ni a, he building hi sak zawh thleng a pawisa mamawh tur zat hi sanction awm fel vek tawh a ni.