Vawiin khan Health Minister Pu Lal Thanzara chuan RMSA Employee Welfare Association (MIREWA) Assembly, Art & Culture Auditorium, Beraw Tlangah a hman pui.
Pu Lal Thanzara chuan RMSA school chu High School la awm ngai lohna thingtlang khaw hrang hrangah din thin a ni a, High School kai rual tawh phawt school kai tir chu RMSA thil tum a nih angin RMSA school awmna khua leh a chhehvelah khawsak harsat avanga school kal chhunzawm thei lote pawh admission tihsak thinin kum 2011 atanga vawiin thleng hian mi sanghnih chuangin pawl 10 an lo pass phah tawh a ni, a ti. High School hi zirna kawtchhuah ti a sawi thin a ni a, zirlaite dam chhung nun kaihruaitu tur, an tuina leh an kal zelna turah High School hian an hma lam nun a hril thui em avangin zirtirtute mawhphurhna a sang hle, Minister chuan a ti a. Classroom chhung chauh ni lo, pawn lamah pawh naupangte tana entawn tlaka an khawsak a tul tiin tunlaia Mizorama hluar em em HIV/AIDS leh zuk leh hmuam dona kawngah thahnemgai taka naupangte zirtir turin a chah a ni.
RMSA Employee Welfare Association (MIREWA) hian General Assembly an neih loh kumah Assembly neih thin nise tia an rel tawh angin kumin hi Assembly an neih hmasak ber a ni a. An Vice President Pu Vanlalpeka’n kaihruaiin an President Pu R.Lalnunhlima’n kalkhawmte lawmna thu a sawi bakah General Secretary Pu K.Lalremsanga hnen atangin report ngaihthlak a ni bawk. Chawhnu lamah rorel inkhawm neiin President Pu R.Lalnunhlima’n a kaihruai thung a ni.
RMSA hi kum 2008-ah bul tan niin Govt. High School ding sa 198 te chu tihchak niin thingtlangah teacher quarters 141 sak zawh a ni a, 61 sak mek a ni. Thingtlang kilkhawr school la nei ngailo khaw 92 ah school a din tawh a, zirlai 2000 chuangin HSLC an pass tawh. Zirtirtute tan study tour a buatsaih sak thinah mi 762 an zinchhuak tawh a, hnam ziarang hmanga intihsiak Kala Utsav a tel turin New Delhi ah zirlai 70 a tir tawh bawk. Zirlai te hawi zau nan State pawnah exposure tour a buatsaih thin a, quiz leh science congress te pawh buatsaih thin a ni a. Kumin National Kala Utsav Bhopal a neih turah zirlai 30 chuang kal turin an inbuatsaih a ni.
