Vawiin hian Serchhip DC Conference Hall ah Bawrhsap Pi Sangchhin Chinzah hovin NLUP Line Department te an thukhawm a. NLUP Special Campaign atana District Level Committee Chairman tur ruat chungchang te, NLUP Fair –cum-Exhibition, District Level leh Block Level a neih dan tur te an rel.

Meeting kaihruaitu Pi Sangchhin Chinzah chuan, sawrkar in a ruahman angin NLUP hnathawh dan leh hmasawnna mipuite hnena hrilhhriatna leh NLUP atanga kuthnathawktute tharchhuah pho chhuahna Fair-cum-Exhibition; tun December lo thleng tur ral hmaa neih tum a nih thu a sawi a. He hun hi District Level ah leh Block level ah neih tum a nih thu  sawiin hlawhtling taka Serchhip District ah hman a nih theih nan tun atanga Line Department te kan inbuatsaih a tul thu a sawi. Department te inpuahchah tan nghal tura ngen in, Fair-cum Exhibition hlawhtling tak neih ngei a nih theih nana theihtawp chhuahpuiah Line Department leh Committee member te a sawm a ni.

Meeting hian District Level Organising Committee Chairman atan Pi Vanlalawmpuii Chawngthu, Minister of State leh Hrangturzo A/C MLA ni bawk chu sawm ni se an ti a, Member Secretary erawh chu NIB in District Level ah Deputy Commissioner a ruat a, E. Lungdar Block Level Organising Committee Chairman ah Pu Liansangzuala Chhakchhuak, SDO, N. Vanlaiphai chu ruat niin Member Secretary ah NIB in BDO a ruat sa a ni.

Fair-cum-Exhibition hi Block ah December hapta hmasa berah neih tura ruahmanna siam chhin niin, District Level ah Hapta vawihnihna ah neih tura ruahman a ni a, District Level Fair neihna hmun atan hian Serchhip Town Hall chu ruahman chhin niin vawiin vek hian Addl. DC Pu Chuauhnuna, MCS leh NLUP Line Department Officer ten a hmunhma siamfel dan tur leh hmanraw mamawh turte hriat nan Serchhip Town Hall hi an tlawh nghal a ni.

Fair-cum-Exhibition ah hian Line Department ten an hnathawh dan leh an hmasawnna photo exhibition an neih bakah an hnuaia kuthnathawktuten an tharchhuah chi hrang hrang phochhuahna neih a ni ang.