Tukin khan Lawngtlai District Bawrhsap Dr Arun T., IAS chuan I&PR Department huaihawta NEDP hnuaia Press Project Site Visit-a KMMTTP kawng laih mek ena kal turte chu DC Bangla kawt atangin a vai liam.

Bawrhsap Dr Arun T. chuan press project site visit chu tluang taka nei tura duhsakna hlanin, NEDP hnuaia project site visit ruahman a ni chu lawmawm a tih thu a sawi a. KMMTTP chu Mizoram mai ni lo, India ram pum tana sumdawnna kawngpui pawimawh tak tur a ni a, chu vang chuan a hlawhtlin ngei theih nan mipui pawhin ngaihven nachang hriat a pawimawh a ni, a ti a. Tuna press mite'n an tlawh tur chu chak zawka project hna thawh nawr kaltu a nih a beisei thu sawiin, project kalpuina kawnga harsatna awm te leh tha zawka hma lak a nih theih dan tur te zir chhuak a, thuneitute hnena thurawn pe thei tura an ngaihtuahna seng turin press mite chu a chah a ni.

He press project site visit-ah hian Lawngtlai DIPRO Pu C. Lalhruaitluanga MIS hovin Lawngtlai District MJA member-te an kal a. An tlawh tur Kaladan Multi Modal Transit Transport Project (KMMTTP) kawngpui laih mek enkawltu  PWD Multi Modal Division-a thawktute leh kawng laih hna thawktu contractor-te'n an tawiawm bawk.

I&PR Department chuan NEDP hnuaiah press study tour leh project site visit te a huaihawt chho mek a. Press project site visit-ah hian district tina press mite chu Mizoram chhunga project an tlawh duh ber thlantirin, District IPRO te kaihhruaina hnuaiah an tlawh hlawm dawn a. Lawngtlai District hi nei hmasa ber tur niin, project dinhmun zir chiang tura tlawh atan Lawngtlai District chhunga project pawimawh tak, ram dang nena insumdawn tawnna kawng pawimawh tak tur KMMTTP kawngpui laih mek hi an thlang a ni.