Samaritan Association for the Blind enkawl Special Blind School, Durtlang chuan vawiin chawhnu dar 2 khan an sikul atanga kumina HSLC pass te lawmpuina hun an hmang a, Pu Lal Thanzara, Health & Family Welfare  Minister  chu khuallian a ni.

Pu Lal Thanzara chuan, khaw hmu fiah lo chunga 100% Pass he school atanga kan nei hi a lawmawm tiin, helai school enkawltu board member te leh zirtirtute thawhrimna rah a ni a ti. Khawvel ah hian khaw hmu fiah lo miropui tak tak an tam a, an tumruhna leh an taimakna avanga hetiang dinhmun thleng hi an ni a, chutiang ang bawkin he sikul-a naupangte chu an kalna kawng turah taima leh tumruhna nena bei tura fuihin  hlawhtlinna reng reng chu vanneihna leh theihna a nih mai piah lamah a pawimawh ber chu tumruhna a nih thu a sawi.

Minister chuan sorkar hmalakna thenkhatte sawiin, Zu zawrh leh Zirna in tan hma sorkar-in a kalpui chu enchhin mek a nih thu a sawi a. Kan ram in hma a sawn theihna tur atana enchhinna a kalpui mek laia a that leh that loh pawh kan la hriat hmaa kil thenkhat atanga  na taka dodalna lo awm  chu pawi a tih thu a sawi. Pu Lal Thanzara chuan Mizoram-ah AIDS-in bu a lo khuar tawh mai bakah sualna hrang hrangin a tuam mek a, hemi do tur hian kohhran, sorkar leh NGO hrang hrangte hi thawhhona tha an neih a tul thu a sawi bawk.

Hemi lawmna inkhawm hi Pu Arsiliana, Executive Secretary, Samaritan Association for the Blind-in a kaihruai a, Pu RK Vanlalringa, Headmaster, SBS in report tawi a pe. Special Blind School hi MAY ni 1 2001 khan din a niin pawl 1 atanga pawl 10 thleng a awm a, tunah hian zirlai 30 an awm a ni. HSLC hi vawi 9 exam tawhin vawi 6 chu 100% an lo pass tawh a ni. Kumin hian zirlai pahnih HSLC exam te chu an passed ve ve a ni.