Nizan dar 8:00 pm khan tt Royte Trophy – Inter Branch YMA Football Tournament 2017 pet hawnna programme chu Central YMA Hall, Tuikhuahtlang ah neih a ni a, Health Minister leh Mizoram Football Association (MFA) President ni bawk, Pu Lal Thanzara chuan khuallian niin a hmanpui.  

Pu Lal Thanzara chuan CYMA leh MFA tangkawpin Inter Branch YMA Football Tournament an buatsaih chu football lama hmasawnna a nih rualin Mizo thalaite ruihhlo laka anlo fihlim theih na atana hmalakna pawimawh tak a ni, a ti a. Mizo tlawmngai pawl lian berin thahnem ngai taka kum tam tak ruihhlo do lama tan an la chu an fakawm a ti a. Pu Lal Thanzara chuan football lamah Mizo mipuite hma kan sawn chak hle a, India ram chhunga football inelna sang ber I League ah Aizawl FC an champion bakah Khelo India, Santosh Trophy, National Sub-Junior leh National Junior level ah nihna sang tak kan nei chho mek a ni a ti. Inter Branch YMA Football Tournament 2017 main sponsor TT Royte Group Chairman Pu Robert Romawia Royte chungah Pu Lal Thanzara chuan lawmthu a sawi a, thahnem ngai taka ama sum leh pai sengso a football lama hma a la chu a lawmawm hle a ni a ti. Mizorama District Football Association hrang hrang hruaitute hmalakna leh thahnem ngaihna pawh fakin, Pu Lal Thanzara chuan Inter Branch YMA Football Tournament 2017 chu branch hrang hrang te in unau na siamtu anih a beisei thu a sawi bawk. 

tt Royte Trophy – Inter Branch YMA Football Tournament 2017 pet hawnna programme hi Pu Lalrochuanga Pachuau, Finance Secretary, CYMA in kaihruaiin, Pu Robert Romawia Royte, Chairman TT Royte Group (main sponsor) chuan a pet hawng a ni. Pu R. Lalngheta, Assistant Secretary, CYMA chuan Oath Taking kaihruaiin, inkhelh dan tur fixture a release nghal bawk a ni. 

tt Royte Trophy – Inter Branch YMA Football Tournament 2017 ah hian team 141 an tel dawn a, chumi zingah chuan Aizawl khawpui chhung atangin team 74, khaw dang lam atangin team 61 leh Joint YMA atangin team 6 te an tel dawn a ni. Vawiin 16th May 2017 atang hian AR Ground, Ramhlun Sports Complex, Joint YMA Field leh Rajiv Gandhi Stadium ah te inkhelh tan nghal a ni.