Nimin khan Chief Minister Pu Lal Thanhawla'n Phaibawkkawn, Seling a Mizoram Food Processing Research & Training Centre (MFPR&TC) hmun a hawng a. He hmun hawnna programme hi Home Minister Pu R. Lalzirliana leh Commerce & Industries Minister Pu H. Rohluna te pawhin an hmanpui a ni.

Chief Minister Pu Lal Thanhawla chuan Mizo in ei tur sawngbawl (food processing) kan la hmelhriat tawk lohna chhan ber pakhat chu kan tharchhuah hi a la tam tawk loh vang leh company te mamawh anga tam kan la tharchhuah loh vangte nia a lan thu a sawi a. Kan tharchhuah tam ber thenkhat pawh sawngbawl lovin phai lamah kan thawnchhuak mai thin a, mahse khawvel thiamna hrang hrangin min rawn thlen ve chinah food processing pawimawhna hi kan hre chho mek a, mimal leh pawl ten hemi kawnga hma an la chho mek chu lawmawm a tih thu sawi a. Food processing ah Sawrkar anga hmalak chu duh angin a hlawhtlin theih loh thu sawiin he thil hi mimal thahnemngai leh hemi kawnga thiamna leh theihna nei ten  tih tak zetin buaipui se, a hlawhtlin theih zawk ka beisei a ni, a ti. Ei tur sawngbawl (processing) leh dahthatna(preservation) kawngah Mizote kan la hnufum tih sawiin a thianghlimna leh a quality te chu thil pawimawh ber a ni a, heng te kan ngaihpawimawh leh kan vei a tul thu a sawi. Mizorama ei leh in tur lakluh a him dan leh a thianghlima dan test na hmun Sawkarin a neih that loh vangin hengte hi  Guwahati a thawn zel a ngai thin a chuvangin Food Testing Laboratory chu buatsaih mek a ni tih a sawi bawk.

Mimal in industry an din a, a subsidy tur ngau ngau an melh hmasak chuan a hlawhtling thei lo tih sawiin hetiang rilru hi kalsan a tul tawh tih a sawi a. Thalai entrepreneurs tih tak zeta hma lak tum an awm hi a lawmawm a, an lakah hian beiseina sang tak ka nei a ni, a ti a. Mimal hmalakna leh sawrkar puibawmnaah hetiang centre changtlung tak mipui zirtirna hmun ni tur, thalai leh a tui te tana eizawnna kawng kawhhmuh theihna hmun ni tur leh thei leh thlai atanga sum dehchhuah kawng zirna hmun tur hmun pawimawh tak hawn a ni ta chu lawmawm a tih thu a sawi rualin Sawrkar in he centre hi ama kut ke a a din theih nan beiseina sang tak a nei tih a sawi tel bawk a ni.

Thusawitu dang Home Minister Pu R. Lalzirliana chuan tun hmaa Sawrkar leh sawrkar puibawmna a din thil sawngbawlna te chu a hlawhtling lova mahse tunah MFPRTC chu chutiang ni loa a hlawhtling leh a dinchhuah ngei a beisei tih a sawi a. MFPRTC enkawlna kawnga Sawrkar anga thu neih tlem a pawimawh thu sawiin tunah ruahmanna ang,  Centre Director in a enkawl tur hi hlawhtling zawk tur a an ngaih thu a sawi.

Programme hmanpuitu dang Commerce & Industries Minister Pu H. Rohluna chuan he Centre hi tharchhuah hrang hranga value addition tan hmun pawimawh tak a nih a beisei tih sawiin Food Testing Laboratory chu a remchan zawk avangin Zemabawk a bun tur a hma lak mek a nih thu a sawi tel bawk.  

MFPRTC hawnna programme hi Pu Zothan Khuma, Commissioner & Secretary, Commerce & Industries in a kaihruai a Pu Joseph L Ralte, Centre Director in hnen atangin Technical Report ngaihthlak a ni. Pu J. Hmingthanmawia, Director, Commerce & Industries in lawmthu sawiin hun a khar a ni.

Mizoram Food Processing Research & Training Centre hi Mizoram thei leh thlai hrang hrang tharchhuahte awmze nei taka zirchianna leh sumpai chang thei tura a sawngbawl dan mipuiin an zir theihna hmun atan ruahman a ni a. He Centre hi Ministry of Commerce & Industry hnuaia Hmarchhak atana Export Development Fund sum hmanga din a ni a. He Centre enkawltu leh viltu chu Commerce & Industries Department a ni dawn a mahse a hnathawh leh nitin enkawlnaah Sawrkar chu inrawlh lovin hengte hi Centre Director kutkawih a ni dawn a. A enkawlna atan hian Commissioner & Secretary, Commerce & Industries Department kaihhruaina hnuaia Management Committee din niin chu chu Mizoram Societies Registration Act 2005 hnuaia ziahluh a ni a.

He Centre hi cheng vaibelchhe 5 vel senga sak niin a sakna tangka hi Ministry tum vek a ni a. A project manah hian kum 3 chhunga a inenkawlna tur sum ruahman niin kum thum hnu ah chuan a ma ke a dingchhuak a sum thawkchhuak tura beisei a ni.

MFPRTC din chhan leh a thil tum te chu - thei leh thlai sawngbawlna, vawnthat(post harvest management) kawnga thiamna dik leh tangkai zawka mipui zirtir te; loneitu leh kuthnathawktu ten an tharchhuah ang ang hlawkna nei tura an sawngbawl dan tur kawng kawhhmuh te; thalaite hnena mahni kutkawih eizawnna (entrepreneurship) leh khawiah pawh thawk dawn se an thiamna tihhmasawn(skill development) kawng kawhhmuh te; hmeichhia ten an awmhmuna sumpai an lo dehchhuah theih ve na atana zirtirna chi hrang hrang pek te; pipu atanga ei leh in sawngbawl dan (traditional method) hrang hrang tihhmasawn te; tualchhuak thei, thlai, ramhmul thil hrang hrangte zirchian leh sumpai hlawkna(commercial application) zawn chhuah te; Food Processing (ei tur sawngbawlna) lam kawng hi ram sumhnar tha leh beiseiawm a nihzia mite zirtir te; thei leh thlai thar dan hunbi mil zela ei tur hrisel leh tui zawk siamchhuah te; Entrepreneurs tenauten man tlawm zawka khawl leh hmanrua an hman theihna (Common Facility) din te leh Sawrkar sumpai tihek lova amah leh amah a inchawm theih nana thlai leh thei sawngbawl a, man tlawm zawka hralhchhuah te an ni.

MFPRTC hmun hma chhungah hian tharchhuah awmze nei sawngbawl dan zirna hmanrua leh khawl hrang hrang te, thlai leh thei zirchianna leh ei leh in endikna Laboratory, thlai leh thei vawnthatna (cold storage), sawngbawlna leh tuammawina (processing and packaging machineries) te, Mipa leh Hmeichhe hostel, Training pekna tur Digital Classroom leh Library te a awm a. He Centre enkawl tur hian mithiam hrang hrang ten mumal takin helai hmun hi an thutchilh a ni.

MFPRTC hian ei tur thianghlim leh rintlak siamna kawnga thuneitu Food Safety Authority hnuaia inziak lut tawhin FSSAI registration pawh an nei tawh a. Pradhan Mantri Kaushal Vikas Yojana (PMKVY) hnuaia Sector Skill Council on Food Processing lamah National Skills Certificate pechhuak thei tura tih tura tulte tihfel a ni tawh a. NEDP hnuaiah Mizoram State Entrepreneurship Development Monitoring Committee chuan MFPRTC hi Partner Institute ah dahin entrepreneurship leh skill development centre-ah an hmang dawn bawk a ni.