Vawiin khan Zarkawt Recreation Hall-ah ‘Upate Ni’ lawmna inkhawm Zarkawt MUP Unit buatsaih chu Parliamentary Secretary to Chief Minister Pu Lal Thanzara’n khuallian niin a hmanpui.

Khuallian chuan tun hun hi thalaite khawvel tia sawi ni bawk thin mahse upate pawimawhna leh tangkaina a nep thei tak tak lo tiin khawtlang, kohhran leh sorkarah dinhmun pawimawh tak an luah reng a ni, a ti. Kum lama upa zawk ten chhungkua leh khawtlanga an pawimawhna an inhriat theih nan leh mimal nun hlim nan khawtlang tana thil tha tih leh anmahni an awm tawhloh hnu pawha midang hlawkpui tur sulhnu tha hnutchhiah an tum thin a. Hetiang taka nung thei tura sap mithiamten a zira an zir a ngaih laiin Mizorama upa te erawh chuan MUP kaltlangin a taka nunpui theihna remchang an nei hi a vanneihthlakin a hlu takzet a ni, a ti. Pu Lal Thanzara chuan MUP, INTACH te leh pawl dang te hmanga upa te hmalakna chhuanawm tiin thalaiten nasa takin an chhawr tangkai a; chanchinbua an thuziak te, Mizo culture leh hmun pawimawh humhalhna kawnga an hmalakna te hi thalai ten an hlawkpui hle a a hriat thu a sawi a, taima leh thahnemngai taka thalaite finchhuaha kawng kawhhmuh zel turin upate a sawm a ni.

Upate ni lawmpuinan Pu Lal Thanzara hian Zarkawt Unit, MUP te hnenah cheng 3000 a hlan a ni.

Pu Lal Thanzara hian kum 80 chunglam mi 19 hnenah lawmpuina thilpek a pe a, Chief Patron Certificate chu mi 15 hnenah khuallian thiannu Pi Zohmingthangi’n a hlan bawk. Inkhawm hi Zarkawt MUP Unit President Pu Thanseia’n a kaihruai a, Unit Secretary Pu Hranga Khiangte chuan Khawvel Upate Ni thuchah a chhiar chhuak a, Unit Report ngaihthlak a ni bawk. Senior Adviser Pu Lalkhama chuan ‘Upate dinhmun sawina, khawvel hmun dangah’ tih thupui hmangin thu a sawi a, Rev. Challianngura’n ‘Upate dinhmun sawina, Bible-ah’ tih thupui hmangin thu a sawi bawk. ‘Chhiatni Thatni’ chungchang, kalkhawm te zing atangin a duh apiang tana sawina hun an hmang zui bawk a ni.