Vawiin chawhma dar 11:00 khan India Hnam Pa, Mahatma Gandhi piancham denchhana neih thin ‘Faina Hapta’ hawnnna inkhawm chu DC Conference Hall, Serchhipah neih a ni a, District Bawrhsap Pu Lalsangliana chuan Khuallian ni a hmanpuiin Faina Hapta hi a hawng nghal bawk.

He inkhawmah hian khuallian chuan thu sawiin fai hi Pathian an teuhna ber a ni a, fai avanga Pathian ang thei kan nih chuan faina pawimawhzia chu a hrechiangtu tur berte kan ni tiin Mizo te chu hnam bal tak ni thin mah ila sawrkar leh NGO te leh mithahnemngaite hmalakna avangin zawi zawiin kan fai chho ve zel a ni a ti. Pu Sangtea chuan fai leh fai loh hi ram changkang leh changkang lo tehfung pawimawh tak a ni a, chuvangin Mizote pawh hi inti changkangin hma sawn inti ve viau thin mah ila kan fai tak tak hma chuan kan changkang ngai lovang tiin faina tel lova changkanna chu changkanna keibai leh belhchian dawl lo a ni a ti.

Khuallian chuan Serchhipa bawlhhlawh sawngbawl dan pawhin a duhthu a sam loh thu sawiin kan khawpui hnawm hnawk zawng zawngte khawpui dai kawngpui kam awih pangah kan paih ringawt a, chumi mawng lam chu Serchhip khawpuiin kan thlai tharchhuahna hmunpui a ni leh si a, thil inhmeh lo tak a ni tiin hnawm hnawk sawngbawlna hmun dang tha zawk leh a sawngbawl dan changkang zawk kan ngaihtuah a tul a tih thu a sawi bawk.

Pu ST. Lalhmingmawia, Sanitation Officer pawhin faina chungchanga department hmalakna te sawiin kan chenna khawpui leh a vel vawn fai chungchangah hmalak a nawm thu te, NGO leh media lamte nena kan thawhhon a that thute a sawi a, kumin hian Faina Hapta pual inelna chi hrang hrang panga (5), Sawrkar Office fai, Zirna in (High School leh a chung lam zawng), Primary School fai, Middle School fai leh Veng fai (Branch YMA level) inelna te a awm dawn thu leh heng lawmman te hi October 9, 2012 kar leh Thawhlehni-a sem tur a nih thu a sawi a, hei bakah hian Chhiahtlang daiah changkang zawk leh tunlai zawk a hnawmhnawk sawngbawlna tur siam turin department chuan chak takin hma a lak mek thu a sawi tel bawk a ni.

He faina hapta hawnna inkhawm hi Pu T. Zadingliana, President, Serchhip Joint VC chuan a kaihruai a, Serchhip khawchhunga department hrang hrang hotu te, Tlawmngai pawl hruaitu te mai bakah zirna in te atangin kal an thahnem hle a ni.