Parliamentary Secretary to Chief Minister Pu Lal Thanzara chuan nizan khan N. Hlimen ah ni hnih awh (April 16 – 17) YMA Subheadquarters , Kolasib rorel inkhawm vawi 2-na, Palai Thlahna Inkhawm a hmanpui a. He programme hi Pu H T Rila, President SYMA chuan kaihruaiin Rorel inkhawm a Agenda – Sawrkar khawih leh YMA khawih hrang hrang an pass te chu a tarlang bawk a ni.

Pu Lal Thanzara chuan Mizo te’n YMA kan neih hi a vanneihthlak hle a, YMA chu ram leh hnam tana sulsutu leh Mizo te tana malsawmna a ni, a ti a. Kawng hrang hranga YMA hmalakna a bikin thing leh mau humhalh kawnga te, tuihna humhalh kawnga te, ram kang leh kangmei venna kawnga leh khua leh tui dik takte chuahin vote an neih theih nan an hmalakna te hian Sawrkar a finchhuahpui thu leh a puibawm thute sawiin, an hmalakna te chu a lawmawm in a ropui hle a ni a ti bawk.

YMA chu politiks leh kohhran ramri kham in a tih buai ve loh thu sawiin Mizo mipui ten YMA chak taka kan kal chho pui zel chuan hnam dangin min chimral thei lo ang a ti a. Chutih rual chuan Mizorama hnam dang awm te hnathawh hrang hrang ang chi te hi kan thawk hrehlo tur a ni a, hemi lamah hian ngaihtuahna sen a, harh a tul thu a sawi lang bawk a ni. NLUP chungchang sawiin a dawngtu ten a nihna ang takin an hmang em tih leh an dinchhuahpui em tih hi venpui an tul a, heng kawnga te hian YMA tanpuina chu Sawrkarin a mamawh a, vilpui turin YMA memberte chu a sawm bawk a ni.

Mizo hnam inpumkhatna atan hmalakna lo dodal leh inlak hranna rilru mi thenkatin an neih hi a vanduaithlak thusawiin Mizote hi in thendarh tham kan awm lo a, Mizo nihna a lungawi a, Mizo puanzarna hnuaia inlungrual tak cheng ho hi inpumkhatna atana a pawimawh in a tul a, hei hian Mizo hnam a ti chakin a tihzahawm thei thu a sawi bawk a ni.

He hunah hian Pu Lal Thanzara chuan YMA Sub Headquarters Kolasib hnuaia infiammi ti tha mi 4 leh fa nei tam nupa tuak 11 te hnenah Sub Headquarters-in citation leh lawmman an buatsaih chu a hlan bawk a ni.

YMA Sub Headquarters Kolasib hnuaia hian Group 4 – Awithangpa Group (Branch 13); Bairabi Group (Branch 15); Sakawrhmuituai Group (Branch 10); Serlui Group (Branch 22) leh Town Branch 19 te an awm mek a, member mi 25852 an awm mek bawk a ni.