Vawiin khan I&PR Auditorium-ah Tuichangral Zirlai Pawl ten Freshers Social an hmanga. Hetah hian Parliamentary Secretary to Chief Minister Pu Lal Thanzara chu khuallian niin Hrangturzo bialtu MLA Pu Lalthansanga chu khualzahawm a ni.

Pu Lal Thanzara chuan zirna sang zawk bei tura lokal zirlaite chu an hmabakah entawn tur tam tak, a chhe zawng leh a tha zawng a awm dawn a, an hmalam hun thlir reng chunga theihtawp chhuaha an zirlai te taima taka zir turin a chah a. Mahni hmasial ran chunga zirlai te hmanga politics khel an awm thin chu pawi a tih thu sawiin chu chu ram hruaitu tha nihna kawng dik a ni theilo, a ti. Zirlaite chu nakin lawka ram hruaitu tur te an nih avangin politics haw lam leh kal lam hre tura an beng an chhit ve reng a tul tih sawiin a thalo lai do ngama, a tha laiah erawh sorkar tanpuia, thlawp tlat turin zirlaite a sawm a ni.

Tunlai Mizorama kawlphetha dinhmun sawi langin Parliamentary Secretary chuan sorkar kal tawh zawng zawng te leh tuna sorkarna changtute pawhin kawlphetha-a Mizoram a hnianghnar theih nan theihtawpin tan an la theuh a ni, a ti a. 17 Electric Power Survey in a chhut dan chuan Mizoram kawlphetha mamawh zual phuhru turin 107 MW  a ngai a, Ministry of Power in Mizoram chanpual tur a dah(allocate) chu 83.2MW a nih laiin an ni pawhin an power hnar zawng zawng atanga an beisei zat an hmuhchhuah theih bik loh avangin tun dinhmunah Mizoram pumpui hi 57MW velin a kal mek a, Luangmualah khawl chhia a lo awm leh zel avangin nasa leh zualin load shedding tih a ngai ta a ni, a ti a, Luangmuala khawl chhia thlakna tur hian khawl thar ngaihtuah mek a nih thu a sawilang bawk. Pu Lal Thanzara chuan kawlphetha-a Mizoram a hnianghnar theih nan theihtawp a sorkarin tan a lak dan a tarlang a, Tuivawl, Kolodyne, Lungreng, Mat, Tuirini ah te Hydro Power siam chhuak turin Firm hrang hrang te nen thawhhona thuthlung an ziah tawh thu sawiin Tuirial Hydel Project  pawh zawhfel thuai tuma chak taka hma lak a nih thu a sawi bawk.PWD changtu ni bawk Parliamentary Secretary Pu Lal Thanzara chuan Mizoram tan Planning Commission-in kawng siamna tur cheng vaibelchhe 200 a pek thu sawiin District khawpui zawng zawngah khawpui chhung leh khawpui inkalpawhna kawng te siam that tumin hma an lak thu a sawi lang bawk.

Hrangturzo bialtu MLA Pu Lalthansanga pawhin zirlaite chu thahnemngai taka lehkha zir tura fuihin an nu leh pa ten lehkha an zir theihna tura thlansa phulkaia an thawh te hre reng turin leh an inpekna chhan let theih dan kawng tha ber chu an zirlaia hlawhtlinna a ni, a ti.