No.3281/2021-2022
Aizawl, the 4th December, 2021 : Pu Lalchamliana, Hon'ble Minister, Home, Taxation, DM&R etc., Hrangturzo Bialtu MLA ni bawk chuan tun hnaia a thawh hnih nan December Ni 2 leh Ni 4 chhung khan a bial chhunga khaw panga; Bungtlang, Keiṭum, Hriangtlang, Khawlailung leh Hmunzawl khua te a tlawh a; bial chhung hmasawnna hnathawh hrang hrangte enin khawtlang hruaitute nen inkawmna an nei.
Pu Lalchamliana chuan December Ni 2 khan Bungtlang High School-in HSLC Exam-ah zaa za an pass lawmnaah khuallian niin a hmanpui a. Pu Chama chuan Bungtlang HSS ten a ṭum nga nan zaa za result an neih avangin a lawmpui thu sawiin pass tharte chu tuna an hlawhtlinna hi an bul ṭanna chauh a ni tih hre turin a chah a, thufingin a bul ṭan ṭhat hi a zahve zo ang a ni an tih rualin, a tawp kharna ṭha hi a pawimawh ka ti a, zirna sang zawkah nasa lehzualin, hrehawm pawisa lova rim tak leh taima taka thawk tur leh, chu chu nakina in nawmsakna tur a ni tih vawng reng ang che u, tiin a fuih. Exam-a pass tum ringawt nilovin mi puitling, mi hman tlak leh chhawr tlak ni tura zir zel turin a chah a ni.
Home Minister hian Bungtlang Higher Secondary School Building sak thar a hawng nghal bawk a. Bungtlang HSS a hawn zawh hian khawtlang hruaitute nen Community Hall ah inkawmhona an nei zui leh a ni.
Bungtlanga hun a hman zawh hian Keitum khua tlawh lehin a tuk December ni 3 ah Hriangtlang, Khawlailung leh Chekawn te a tlawh leh a. Vawiin hian Hmunzawl a tlawh leh bawk a ni.
Pu Lalchamliana chuan a bial chhung khaw hrang hrang a tlawhnaah hian khawtlang mipui leh hruaituten an lo dawnsawn danah lawmthu a sawi a. Khaw tina khawtlang hruaitute nen inkawmna hun ṭha tak an nei thei vek a. Aizawl lama kal harsate tan leh amah hmuh mamawhtute tan interview hun leh dilna thehluh hunte a buatsaih sak zel a ni. Tin, Hrangturzo bial chhunga hmasawnna hnathawh hrang hrang thawh mekte leh hmalakna thar tura ruahman te a theih chen chen a hmunah tlawhin a endik nghal bawk.
Pu Lalchamliana chuan, "Inthlan dawnah chuan Party hrang hrangin chak zawk nih tumin kan inbei ṭhin a, inthlan a zawh tawh hnuah chuan khawtlang ṭhatna turin kan thawkho thei tur a ni," a ti a. Amah lo hmuaktute hnenah, mipui ta kan nih avangin min beitute leh min ṭan lotu zawng zawngte tan pawh kan ding tur a ni a, kan Martar-te pawh khan chu chu an rilru a ni, a ti.
Pu Lalchamliana chuan abial chhunga MLA Fund leh hmun dang aṭanga khawtlang leh bial hmasawnna hna thawh nana sum leh hna rawn lut reng rengte chu neitu thinlung pu a, khawtlang leh bial tana rotling din duhna rilru pu chunga thawk ṭheuh turin a chah hlawm a ni. Tuichang lei dawh mek pawh a hmunah en lehin hnathawktute chuan March 2022-a zawh theih ngei an tum thu an lo hrilh a, an sawi anga a huna zo ngei tur leh inthlahdah lova hna thawk turin hnathawktute hi a hrilh a ni.
Attachment
- Loading attachment...
