Vawiin tlai hian Serchhip Tourist Lodge tualah Fédération Aéronautique Internationale (FAI), Category II International Paragliding Accuracy Championship, 2020, Mizoram, India hawnna inkhawm buatsaih a ni a. Pu Lalchamliana, Home Minister, Mizoram chuan khuallian niin he intihsiakna hi a hawng.

A hawnna thu a sawiah Minister chuan, khawvela adventure sports ngaihhlut hlawh Paragliding tih theihna tur hmun tha tak mai Mizoram in kan neih avangin lawmawm a tih thu a sawi a. Adventure Sports chu huaisenna min petu, harsatna su ngam tura min tichaka min tichhel thei sports a ni a, taksa leh rilru hriselna atana infiamna pawimawh tak a nih avangin a hlu a, a ti thinte pawh an ngaihsanawm a ni, tiin he intihsiaknaa tel tura khawvel hmun hrang hrang atanga kalkhawm te chu a chah a. An intihsiakna tur te chu dan hnuaiah, inzahtawnna leh infiammi rilru thianghlim tak pu chunga bei tura fuihin, chetsualna awm thei lakah fimkhur turin a ngen a, duhsakna a hlan a ni. Pu. Lalchamliana hian he intihsiakna a hlawhtlin theih nana tha thawhtute zawng zawng chungah lawmthu sawiin, a bik takin Pu Robert Romawia Royte, Sports Minister inpekna leh theihtawp chhuahnaah lawmthu a sawi a ni.  Khuallian hian he intihsiakna atana mi pawimawh lokal te hnenah anmahni lo lawmna thilpek a hlan nghal a ni. Home Minister hi Pu TC Pachhunga, Vice Chairman, Tourism Board in a rawn tawiawm a ni.

He hunah hian Pu C. Lalramzauva, Sr. Advocate, Adviser to CM pawhin thusawina hun a hmang a, mihringte remruat chhuah leh rawt puitlin theih ni hauh lo, Paragliding tih theihna hmun remchang leh tha em em mai Serchhipa Pathianin a dah chu lawmawm a tih thu a sawi a, intihsiakna hlawhtling tak a awm theih nana tha thawhtute zawng zawng chungah lawmthu a sawi bawk.

He hun hi Pu V. Lalengmawia, Director, Tourism in a kaihruaia, intihsiaknaa tel tur leh a buaipui tura lokal te chungah lawmthu a sawi a, mamawh an neih te, harsatna an neih te leh thil dang duh an neih te thawktute hnenah inthlahrung lova sawia Mizoramah hun nuam tak hmang turin a chah a ni.

Pu J. Vanlalliana, President, MASA chuan report pein he intihsiaknaah hian tel tum mi 67 vel in register mah se, vawiina pilot rawn thleng tawh hi mi 25 niin lo kal mek hi 4 vel an awm a, Foreign Pilot hi Korea, Afghanistan leh Kazakhstan atangin an rawn kal a, Meet Director Pu Zlatko Spirkoski, Macedonia leh Chief Judge Pu Jaka Gorenc, Slovenia leh ram chhung atanga officials te leh Aero Club of India aiawh te an rawn kal hlawm a, intihsiakna hi naktuk atanga tanin inrinniah a kharna neih tura ruahmanna siam a ni.

A hawnna inkhawmah hian Pi Esther Lalruatkimi, IRS, Commissioner & Secretary, Tourism, Dr. Lalzirmawia Chhangte, IAS, DC, Serchhip, Pu R. Sathyiasundaram, IPS, SP, serchhip a officers sawm bik te, Tourism department officers leh thawktute, MASA General hruaitute, Serchhip sub Headquarters hruaitute, media mite, khawtlang hruaitute leh midangte an tel a. Serkhawpui Cultural Club leh Lancy Remlalhruaii ten hun an hmang bawk.

Pi Irene Zohlimpuii Chongthu, Jt. Secretary, Tourism chuan lawmthu sawiin hun a khara, zanriah an kilho nghal a ni.