Vawiin khan Ministry of Development of North Eastern Region (DoNER) Secretary Dr. Inder Jit Singh chuan Zoram Medical College, Falkawn a tlawh.

Dr Inder Jit Singh chuan NITI Aayog-in Sustainable Development Goals (SDG) index a buatsaihah kawng hrang hranga tehin Mizoram chuan hmasawn a ngai hle a, a bik takin Health Sector-ah tanlak nasat leh zual a ngai, a ti a. Zero Hunger ah erawh ram pumah Mizoram chu pahnihna niin Zero Poverty ah pangana a ni a, hemi kawngah erawh an chhuanawm hle tiin sector danga an tlakhniamna laiah te tang turin a fuih. Zoram Medical College tih changtlunna turin a theih ang kawng apiangah tanpui a inhuam thu DoNER Secretary chuan a sawi bawk.

Mizoram sawrkara Health Secretary Pu Lalengmawia pawhin thu sawiin sawrkarin mipui mimir hriselna a ngai pawimawh thu leh hriselna kawnga hmasawn turin tan zel a nih thu a sawi a. Thawktu indaihlohna te, ruhrel din tur hmachhawp tam tak la awm te leh harsatna kawng hrang hranga awmte sutkian a nih theih nan sawrkar laipui DoNER Ministry tanpuina a ngen a ni.

Kum hnih chauha upa, Mizoramin medical college a neih hmasak ber leh neih chhun Zoram Medical College ah hian MBBS zirlai mi 198 an awm a, batch hnihna an kal mek a ni. Lecture Hall-1 ah hian DoNER Secretary puala programme siam niin ZMC Director Prof.L.Fimate chuan a kaihruai a, ZMC Registrar Dr.Jane R.Ralte chuan ZMC chanchin tlangpui a sawi a ni.

DoNER Secretary hian nimin khan Reiek a tlawh a. Mission Organic Mizoram hnuaia Reitlang Organic Turmeric Producers Company Limited hmalakna a hmunah a en bakah Reiek Tlang tourist resort-a DoNER Ministry sum hmanga Tourism Department hmalaknate a en bawk a ni.