Power & Electricity Department chuan vawiin khan Aijal Club-ah kum kallai mek 2019-2020 chhunga an hnathawh thlirletna “Works Review Meeting” an nei a, Power & Electricity Department Minister chuan khuallian niin a hmanpui a, Department Officer SDO chin chunglam an tel a ni.

Khuallian chuan Power & Electricity Department officer kalkhawm hma ah thu sawiin kawlphetha hnianghnar pe tura Power & Electricity Department in theihtawp an chhuah avangin lawmthu a sawi a, Department hnathawh dan hi fimkhur a ngai em em a ni tiin tihsual palh a thihna thlen thei thil a nih thin avangin officer leh staff te inpawh tlang tak leh fimkhur theihtawp a hna thawk thin turin a chah a ni. Minister chuan thawktu indaihlohna in a beng a thlen thu leh hma lak a tum thu a sawi a, Department in mimal pawisa cheng vaibelchhe 15 zet a bat chu chinfel ran dan zawng tur te, project hnathawh a hun taka zo tura tan la tur leh an thiamna ram leh mipui tan nasa lehzuala hmang turin a fuih a, a dik lova ti thinte chu an mualpho mai tur a ni tiin fimkhur taka hna thawk turin fuihna thu a sawi a ni.

Minister chuan Department dangte nen sum inhlanchhawn ngai hna a awm reng rengin dik tak leh rintlak taka estimate fel taka siam zel a pawimawh thu sawiin Review meeting hlawhtling taka hmang turin duhsakna a hlan a ni.

Works Review Meeting kaihruaitu Er. Lalduhzuala Sailo, Engineer-in-Chief chuan tunlai hian Aizawl khawpui chhungah Transformer overload avanga chhia a tam thu sawiin Engineer ten an tihtur an tih tawkloh avanga thil thleng a nih leh nih loh inenchian an mamawh thu a sawi a, thawktu indaihloh vanga sub-station hawn theihloh a awm nual thu te, maintenance material an tlakchham vanga harsatna an tawh thu te a sawi bawk a ni.