Vawiin chawhma khan Conference Hall, Raj Bhavan-ah Dr. Inder Jit Singh, Secretary, Ministry of DoNER chuan Governor P.S. Sreedharan Pillai a kawm.

DoNER Secretary Dr Inder Jit Singh chuan ni 2 chhungin Mizorama project kallaite a hmunah a tlawh thu te leh Chief Secretary Pu Lalnunmawia Chuaungo bakah Official te thil pawimawh a sawipui tawh thu Governor hi a hrilh a. Governor hnenah hian Mizoramin tanlak a ngaih nasat thu sawiin NITI Aayog in tunhnaia a tih chhuah - Sustainable Development Goal India –Index & Dahsboard 2019-20 a Mizoram State dinhmun te pawh an sawi dun a ni.

DoNER Secretary chuan NITI Aayog zirchiannaah Sector pawimawh zual Economic Sector, Infrastucture Sector leh Health & Sanitation Sector-ah Mizoram chu state 28 zingah a mawngphah zingah an awm tih a sawi a. Tunhnaiah Mizoramin tan a rawn la thar chu thil lawmawm tak a nih rualin hmalakna tur a ngah hle a ni a ti. Health Sector huangah Mizoramin AIDS/HIV avanga harsatna a neih mek chu harsatna liantham tak leh ngaihsak ngai lai a ni a ti a. Project kalmek a tlawh te pawh hnathawh zawh hun bi tuk aia kum 2 atanga a aia rei fe fea tlai te an ni tih a sawi a. Mizoram bakah Hmarchhak state chhunga Project thawh hun chhunga zawh theihloh te avangin Central Sawrkarah DoNER tan, Ministry tin atanga 10% Fund for North East States kaltlanga sum dilhbelh leh haichhuah a harsat phah a ni a ti. Mizoram tan bik Tourism leh Skill Development Sector-ah hnathawh tur a tam hle a, sum haichhuah kawngah pawh chak zawka hma an lak a ngai a; heng sector pahnih atanga Mizoramin project siamna atana sum a lakchhuah chu a la tlem tham hle a ni a ti. Governor P.S. Sreedharan Pillai chuan DoNER in thahnem ngaia Mizoram an rawn zirchiang chu lawmawm a tih thu a sawi a. Tan lak ngai lai te pawh Mizoram sawrkar chuan a rang lama a lo zir chian dawn baka rawtna leh hmachhawp tam zawk DoNER leh NEC ah te thehluta umzui turin a inpuahchah mek a ni tih a sawi a. Project kal mek te pawh a hun pangaia thawh zawh a nih theih nan sawrkar chuan theih tawp a chhuah dawn a ni a ti.