2198/2022-2023
Dated Serchhip, the 6th October, 2022: Vawiin chawhnu dar 1:00 pm ah khan Pu Lalchamliana, Minister, Home, Taxation, DM&R Department, Hrangturzo bialtu MLA ni bawk chuan N. Vanlaiphaiah Subsidiary Distribution Center Godown thar a hawng  a, Godown, Staff quarters leh toilet block sak thar te a fang nghal.

Godown hawnnaah Pu Lalchamliana chuan Supply Department in Mizoram mipuiten man tlawm zawka buhfai ei tur an lak theihna atana an inpekna leh an hnathawhte, hun harsaah kawng pangngai bakah Manipur leh Tripura kal tlang bakah Myanmar leh Bangladesh thlenga kawng an dap thin te chu fakawm a tih zia a sawi a. FCI aṭanga State quota buhfai kan kham loh avangin Open Market aṭanga to zawka lei a ngai ṭhin a, chungte pawh chu a man tlawmin mipuite hnenah a pe zel a, buhfai man tih pun tumna te awm ṭhin mah se Sawrkar chuan mipuite dinhmun ngaihtuahin buhfai man a la ti sang rih lo tih a sawi. Buhfai mai bakah Gas (LPG), Petrol leh Diesel te pawh mipuiin an nghei loh nan Sawrkarin theihtawpin hma a la ṭhin a, Supply Department pawhin an hahpui hle ṭhin tih a sawi langin an thawhrimna zarah mipuite nghei lovin thlamuan takin kan awm thung a ni, a ti a. Godown thar chu ṭangkai taka N. Vanlaiphai leh a chhehvel khua ten hmang tura duhsakna hlanin, a venhim leh uluk a ngaihna kawngah te ṭhahnem ngai turin N. Vanlaiphai khawtlang mipuite a chah bawk a ni.

N. Vanlaiphai SDC Godown hawnna hi Pi Ramdinliani, Secretary, FCS&CA in a kaihruai a. Godown sakna hi NABARD hnuaiah Construction of Intermediate Storage Godown & Related Infrastructures Project Rs. 39.61 Crore Mizoram in a hmuh aṭanga Godown 21 sak te zing ami a ni a. N. Vanlaiphai Godown bik atan hian Rs. 183.92 lakh hman niin Godown bakah Staff quarters te, toilet block te sak tel a ni. Babie Construction & Consultancy Services sak niin Godown hi FCS&CA Department kutah hlan nghal a ni a, Department aiawhin Dr. Andrew H. Vanlaldika, Director, FCS&CA in document te hi a dawng a ni.