No.357/2020-2021

Minister of State for School Education Pu Lalchhandama Ralte chuan vawiin khan kharkhipna kalpui laia zirlai naupang leh zirtirtute tan Department leh SCERT ten ruahmanna an siam chungchang leh MSBE in Pawl 12 Exam la zo lo te tan Exam chhunzawm hun an siam chungchangte a sawi fiah a. Hemi hnu hian Samagra Shiksha Annual Work Plan leh Budget 2020-21 chungchang School Education Department hotulute nen Samagra Shiksha Office Conference Hall-ah an sawiho zui nghal a ni.

Pu Lalchhandama Ralte chuan March ni 23 atanga inkharkhipna kalpui a nih hnu hun reiloteah Department hotuten ngaituahna sengin engtin nge naupangin he hun hi an hman tangkai theih ang tih te, online-a zirna an chhunzawm thei dan tur te leh activities hrang hrang engtin nge kalpui theih a nih ang tiin ruahmanna hrang hrang an siam thu a sawi a. April ni 13 atanga tunkar chhung nitin tlai dar 3:00 atanga tlai dar 5:00 thleng DDK Aizawl kaltlangin Pawl 10 zirlai naupangte tan Science leh Mathematics Online Tutorial Class tan a nih thu te, vawiin atangin kartluanin LPS 1-ah tlai dar 4:00-ah, naktuk atangin ZONET Zawlbuk-ah tlai dar 2:00-ah chhuah thin a nih tur thu te a sawi a. Pawl 9 zirlai naupangte tan pawh Science leh Mathematics subject-ah Online Tutorial Class chu kar thar atangin kar khat atan tichhuah tum a nih thu a sawi. DDK Aizawl chuan heng online class-te hi an YouTube channel-ah engtik lai pawha zirlai naupangten an en theih turin an dah chhuak(upload) dawn bawk a ni.

School Education Minister hian zirlai naupangten an hun tangkai zawka an hman theih nan SCERT in ruahmanna a siam Edu Challenge 2020 chungchang pawh sawiin Primary, Middle leh Secondary zirlai leh zirtirtute tana intihsiakna leh programme hrang hrang an duan te a sawi a. A thawkhatna atan April ni 13 leh ni 17 inkar chhung hian Primary School zirlai naupangte tan ‘Lockdown’ tih thupui hmanga Poster Making intihsiak buatsaih a ni. Middle School zirlai naupangte tan Poster Making intihsiakna tho ‘COVID-19 laka inven dan’ tih thupui hmangin an siam a. Primary School zirtitute tan ‘Innovative Practice in Teaching’ tih hmangin video clip tawi siam intihsiakna an kalpui mek a. Hengte hi Whatsapp hmanga thehluh tur a ni. Hetiang intihsiakna hi karleha Secondary School zirlai naupangte leh zirtirtute tan SCERT in a ruahman dawn tih sawiin Minister chuan kartin neih a nih theih nan ruahmanna kalpui a nih tur thu a sawi a ni.

Pu Lalchhandama Ralte chuan MBSE-in nimina Pawl 12 Exam chhunzawm tur thu an chhuah chungchang sawiin he thil hi kan ram boruak te thlirin eng chen nge COVID harsatna in min tihbuai dawn tih hriatthiam a har a, zirlai tam zawk te subject pakhat chauh exam an la hmabak a. Hun khirh tak an tawn mek nen zirlai naupangte hian hrehawm tiin tam tak exam la hmabak te hi an tangkhangin an laklawh a. Kil tin atangin ngaihtuahna senga sawiho a nih dante sawiin Minister chuan zirlai naupangte hmakhaw ngaiin MBSE-in Pawl 12 Exam chhunzawm leh tur thu an chhuah leh ruahmanna an siam chu loh theih lohna avangin tih a tul thu a sawi a ni.

Hemi chungchang hi April ni 13 a Chief Minister hova Council of Ministers thukhawm pawhin sawihoin tha an ti niin Pu Lalchhandama Ralte chuan a sawi a. Hemi ni veka Chief Minister hova political party hrang hrang aiawhte, MKHC leh tlawmngai pawl hrang hrang hruaitute leh khawtlang hruaitu aiawhte nen meeting an neihah pawh hemi chungchang hi sawiho niin kalpui hram tha an ti niin a sawi. Pawl 12 Exam zawh nan nithum chauh a awm tawh tihah lockdawn hi kalpui a ni a. Pawl 12 Exam hmachhawn zirlai naupang 12,609 zinga zirlai 8000 velin exam an zo hman a, zirlai 4700 bawr velin subject 1 theuh an la hmabak tih a tarlang a. April ni 22 a exam turah zirlai naupang 4939 an awm thu te, April ni 23 exam turah zirlai naupang 1641 an awm thu te, April ni 24 exam turah zirlai 446 an awm thu te leh Centre 84-ah Exam hi chhunzawm a nih tur thu te chu Education Minister hian sawi bawk a ni.

Exam buatsaih turah hian social distancing chu uluk taka kalpui a nih tur thu sawiin Pu Lalchhandama Ralte chuan zirlaite veihvahna tur lirthei pawh tlan phalsak turin State Level Task Force ah thlen a ni ang, a ti bawk.