1846/2026-2027

Dated Aizawl, the 18th August, 2026: Vawiin khan Chief Minister Pu Lalduhoma chuan Dawrpui Multipurpose Hall-ah Mizoram Gorkha Youth Association (MGYA) Golden Jubilee lawmna hun chu khuallian niin a hmanpui a, Golden Jubilee Lungphun a hawng.

Chief Minister chuan, Mizorama Gorkha thalaite kaihruaitu pawl chak tak MGYA kan nei hi vanneihthlak ka ti a. Mizorama Gorkha thalaite kaihruaitu tha ber a ni.

Gorkhate hi hnam huaisen, tlawmngai, themthiam bawk si in nih avangin British sorkar khan an duh em em che u a. Mizorama British an lo luh pawh khan an kutke pawimawh ber zinga mi in ni. Tlang mi ve tho in lo nih avang leh Mizote ang bawka hnam tlawmngai leh nunnem tak in lo nih avangin kan pi leh pute pawh khan an ngaina em em che u a, chengho tura khuanu siamsa ang maiin kan inngeih zui ta a. Vawiin thlengin kan inkarah innghirnghona a la awm ngai lo a ni. In hnen atangin kan nu leh pate khan thil tam tak an zir a, nangni pawhin Mizote hnen atangin nunphung tha tam tak in la chhawng a ni.

Kum 1966-a ram a lo buai khan Gorkha thalai eng emaw zat Mizoram tan an rammu a. “Dam leh tlang khatah, thih leh ruam khatah” tiin kan lo tuarin kan beiho a. Mizoram Gorkha unaute thusawi, thinlunga cham reng thin chu, “Mizoram bak lu nghahna hmun kan nei lo” tih hi a ni.

Ram rorelnaah pawh District Council hunlai khan Gorkha eng emaw zat hi VC nominated member-ah an awm a, UT kan han nih khan Pu Kapurchand Thakuri chu nominated MLA atan dah a ni bawk. Vawiina kan chawimawi Agastya Thapa hi Chhingchhip Sainik School, kum 2017 atanga class kalpui tawh atanga National Defence Academy & Naval Academy Exam-a tling hmasaber a ni. Kawng dangah pawh kan Gorkha unaute hian kan ram tan thil tha tam tak in ti tih kan hria a. A bik takin thangtharte kaihhruaina kawngah MGYA hi lo tang sauh sauh ula ka duh a ni, a ti. Kan sorkar hian minority-te hmakhua kan ngai em em a, an tana thil tha kan tih theih chi hi chu kan ti zel dawn a, thlamuang takin awm ula kan duh, a ti bawk.

Central YMA President Pu R. Lalngheta pawhin thu a sawi a ni.

Mizorama Gorkhate hi British lo luh rual khan an lo lut ve nghal a, an pension hnuah an rama kir tawh lovin Mizoramah an khawsa zui zel a, a hunlai khan sorkar pawhin an chenna tur hmunte a ruahmansak a, an hnam dan anga an inenkawlna turte pawh a siamsak a. Kum 1950 chhiarpuiah khan Aizawl District-ah mi 2557 an awm tling tawh a, tunah hian mihring 8000 vel Mizoramah hian an awm mek a ni.

Mizoram Gorkha Youth Association hi kum 1976 August ni 18-ah Khatla Venga Gorkha thalaiten bul tanin an din a, Mizoram pum huapin kum 1976-ah a kal tan a, tunah hian Branch 17 an nei mek a ni.

Inkhawm hi Pu Pratap Chhetri chuan kaihruaiin, MGYA Central President Pu Mahesh Rai chuan kalkhawmte lawmna thu a sawi a. Chhingchhip Sainik School Cadet zinga National Defence Academy & Naval Academy Exam-ah tling thei hmasaber Tlangval Agastya Thapa hnenah lawmpuina citation hlan a ni.

MGYA Central Vice-President Pu Nabin Thapa chuan lawmthu sawiin he hun hi a khar a ni.