1847/2026-2027

Dated Aizawl, the 18 August 2026: Vawiin khan Aizawl North leh South Treasury hotute buatsaihin BNRGSK Hall Aibawkah, dan lova pension/family pension lâk tihrehdan tur zirho a ni a. Pi Lalthanpuii, AA&O chu Resource Person a ni.

He hunah hian Resource Person Pi Lalthanpuii, AA&O chuan zirhona kaihruaiin, Dan lova family pension la mek te'n anmahni duhthlanna ngeia an tihtawp (surrender) theih nan Mizoram sawrkar chuan kumin September thla thleng hun a pe tih tarlangin, chumi hnu lamah chuan ngaihhnathiamna awm tawh lovin, dan hnuaiah thubuai siamsak an nih tur thu Sawrkar chuan thuchhuah a siam tih a sawi a. Resource Person chuan, "Mahni duhthu ngeia in surrender te chu sawrkar chuan a ngaidamin, pawisa pawh chawitir an ni dawn lo va. Mahse, September 2026 hnu lamah chuan in ngaihdamna awm tawh lovin, BNS emaw BNSS hnuaiah thubuai rip tak siamsak an ni ang a. Pawisa chawi leh jail tan thlengin dan hnuaiah hremna lekkawh a ni ang," a ti a ni.

Sawihona hlawkthlak tak neih zui nghal niin, Hetah hian Treasury hotute chuan Dan lova family pension la mekte chu pension an lâkna ṭheuh Treasury Office ah surrender-na form hmanga PPO pe kir turin an sawm a. Hun tiam a ral hnuah chuan Task Force hmanga endik hna thawh tur a ni tawh dawn thu leh Document diklo pe chhuaktute pawh dan ang taka an chunga hmalak a nih tawh tur thu sawiin, Sawrkar tawiawm tlat turin Kohhran hrang hrangte, Khawtlang hruaitute leh Tlawmngaipawl bakah sawrkar hnathawk zawng zawngte chu Treasury hotute hian an sawm a ni.

Mizoram Sawrkar hnuaiah dan ang taka family pension la thei tawh lo, document diklo hmanga la la zui mek eng emaw zat an awm nia hriat niin, Hemi kawnga Kohhran te, Village Council leh YMA bâkah sawrkar department-te mawhphurhna pawimawhzia sawiho a ni a. Treasury hotute chuan Kohhran, YMA leh VC hruaitute chu, an mi leh sâte dinhmun, sawrkara thehluh tur hriatpuina lehkha diktak chauh pe chhuak thin turin an ngen a. Sawihonaah hian kalkhawmte pawhin, theihtawp chhuaha sawrkar chu thawhpui zel an tum thu leh, a zau thei ang bera lo puanzar ve an tum thu an sawi a ni.

'Voluntary surrender of pension payment order' chungchanga in hrilhhriatna (sensitisation) hi kalpuiin district tina block hrang hrangah Treasury Office tinte chuan hun an hmang mek zel a. Vawiina hun hman hi Pu Allen VL Pundir (Aizawl South Treasury Officer) chuan a kaihhruai a. Aibawk BDO VL Chaka Hmar hovin Aibawk BDO hnuaia veng leh khawtina VC te, YMA leh Kohhran Bial hruaitute, pensioner leh office DDO tin te bakah registrar of births & deaths aiawhte chu he hunah hian an tel  a. Aizawl North Treasury Officer Dr. Lalzahawma chuan lawmthu sawiin hun hi a khar a ni.