Rajya Sabha MP Pu Lalhmingliana’n vawiin khan Kolasib Diakkawn YMA Hall, ama MP Fund senga sak a hawng.

Hawnna thu sawiin Pu Lalhmingliana chuan Diakkawn YMA, NGO te leh khawtlang mipuite tanrualna chu thil ropui tak, Zoram puma khaw tinte entawn tlak a nia a hriat thu a sawi a. Ama MP fund baka an sum thawhkhawm tam tak leh hnatlang tha tamtak an sente chu an inpumkhatzia tilangtu a ni, a ti a ni. Pu Hminga chuan Kolasib District chu kawng engkimah ramri venhim thuah te, hnamdang nena in laichin kawngah te a dai do an nih avangin a pawimawh hle a , Sawrkar tan pawh a bika ngaihsak ngai, Mizo hnam leh ram humhalh nana uluk ngai a ni, a ti a. Tun thlenga Kolasib District-in Govt. Higher Secondary pakhat pawh ala neilo chu rualawh thlak hlea a hriat thu sawiin khawtlang nu leh pate a thara intel ruha sawrkar pawh chak zawka nawr a ngai a ni, a ti. Mizote zingah sum ngaihhlutna a lian ta lutuk chu inbihchian tul hlea a hriat thu Pu Hminga chuan a sawi a. Sum hian chatuan ram min thlen dawn lo tih hi hre thar leh ila, Rinawmna leh Taimakna, kan pi/pu huna kan neih thin kha I vawng nung thar le hang u, a ti a ni.

Kolasib Diakkawn YMA Hall hawn tak hi chhawng 5 (4 floors) a ni a. Hall hi a zau zawng chu a dung 120 ft leh a vang 60 ft. a ni a. A sakna tur hian Pu Lalhmingliana chuan a MP fund atangin Rs 90,020,000/- a pe a. Hei bakah hian khawtlang mipui ten engemaw zat thawh khawmin Ex MLA Pu K. Lalrinliana chuan Rs 1,00,000/- a MLA fund atangin a pe bawk a. A zavaia an senso chu Rs 103,32,995/- a ni. A chhawng hnuai berah hian MP Pu Lalhminglianan a hming a phuah Khawngaihna Run, mi rethei chanhai chhungkaw pahnih luah theih tura In 2 chu MP hian a hawng nghal bawk a ni.

Diakkawn YMA Hall hawnna hi Pu Lalrinchhana, VCP Diakkawn in a kaihruai a. Zai leh Lam te en tir a niin tlaiah Hall thar lawmna ruai theh a ni.