Vawiin khan Education Minister Pu Lalsawta’n Mizoram Middle School Teachers’ Association (MSTA) Annual Conference vawi 8-na Synod Conference Centre a neih chu khuallian niin a hmanpui.
Education Minister chuan zirna hmasawnna tura hma an lo lak tawh leh an hmachhawp thenkhat te a tarlang a. Chung zingah chuan B Ed training-na College of Teachers Education ni thin M.Ed training theihna tura Institute of Advance Study in Education a hlankai a nih thu te; Middle School Headmaster gazetted status a dah an nih tak thu te; zirlai te tana thiam awl thei tur zawngin Hindi zirna tihdanglam a nih thu leh devanagiri script paih chuang lova roman script a zirtir an nih tur thu te; zirtirtu thawklai te bakah la thawklo te tan pawha training theihna turin District hrang hrang a District Resource Centre-te DIET a hlankai an nih tur thu te bakah administration khawih turin Mizoram School Education Service leh Mizoram Higher Education Service siam tum mek a nih thu te a tel a ni. Chhawr tlak leh thiamna tak tak zirlai ten an puak chhuah theih nan Mizoram zirna chuan tin zawn neiin kal dan mumal tak a nei dawn tih sawiin Pu Lalsawta chuan Mizoram Education Policy duan a nih thu a sawi a. Zirlai bu a inziak ang ang vawnga, exam-na a mark hmuhsan ringawt tum tawh lovin mipuitling, khua leh tui tha an nih theihna tur te; hnam anga zirlaite inchhuan theihna tur culture lam thil te; environment lam hawi te thlenga naupang ten zirtirna an neih theih nan he Education Policy-ah hian Mizoram zirna kalpui dan tur tha zawk duan a ni, a ti.
Khualzahawm Education Director Pu P Lalchhuanga pawhin zirtirtute fuihna thu sawiin Director chuan ram leh hnam innghahna zirlaite an kutah a awm tih hria a zirlaite leh an nu leh pa te laka mawhphurhna lian tak an neih hlenchhuak ngei turin a chah a. Khawtlang leh kohhrana rawngbawlna chelhtute pawhin zirtirna kawnga an mawhphurhna a dal tur a ni lova, zirtirtu a nihna anga a mawhphurhna hlenchhuak lo chu kohhran rawngbawltu tha a ni theilo, a ti.
MSTA Conference hi an President Pu C Zairema’n a kaihruai a, General Secretary Pu Rosangluaia’n an pawl hmalak dan tlangpui a sawi a, MSTA Jt. Secretary Pu Rosangzuala Ralte bakah Pu Lalhmachhuana, SPD, Mizoram ten thu an sawi a ni.
