Vawiin khan Education Minister Pu Lalsawta chuan Mizoram Educational Foundation (MEF) Khawmpui vawi 6-na, I & PR Auditorium-a an buatsaih chu khuallian niin a hmanpui.
Pu Lalsawta chuan MEF chu mahni hna pangngai bakah zirna sang zawk atana an ngaituahna sen chuan Mizoram tan rah tha a chhuah ngei a beisei thusawiin hun lo kal zel turah Zirna atan thawhhona tha leh hlawkthlak an nei a beisei thu a sawi a. Pu Lalsawta chuan tunhnaia Central Advisory Board of Education thukhawm chuan rampum huap Education Reform Commission din a rel thu sawiin he meeting-ah hian All India Survey on Higher Education chuan an report hnuhnung berah rampumah Gross Enrolment Ratio (GER) in higher education chuan za zelah 18.8 a phak tawh thu an tarlan a sawi a.
Ram puma hna zawng an tam tawh vangin zirna sang zawk ah pawh thiam bik inzirtirna (skill development) chu ngaihpawimawh anih thusawiin Mizorama pawh hetiang atana Chief Minister kaihhruaina hnuaiah Mizoram Skill Development Society din a ni a, hei hian kawng hrang hrang a bikin sap tawng zirtir hna thawk turte te leh nurse te sap tawng zirtirna kawnga hma la chhoh mek a ni, a ti a.
Education Reforms Commission Mizoram chungchang sawiin Commission rawtna te tihhlawh tlin nan hun a duh avangin an rawtna te zirchian tur leh kalhmang duang turin , Pu Laltawnga kaihruaina hnuaia Group of Experts din thu leh anni hian tunmaia tih mai thei, hun rei vak lo a tih theih leh hun rei ngai tur chi rawtna te an thliar a. Group of Experts hnuaia heng rawtna te bawhzui turin Working Group leh Task Force engemaw zat din a ni, a ti bawk. Education Reforms rawtna angin Mizoram School Education Service leh Mizoram Higher Education Service te chu siam turin hmalak mek anih thu a tarlang tel bawk.
Pu Lalsawta hian MEF in Mizoram Education Journal an buatsaih chu a tlangzarh nghal a. Inkhawmpui hi MEF President Prof. Lalhmasai Chuango in a kahihruai a, Dr. Lalbiakdiki Hnamte, General Secretary, MEF chuan MEF tobul, a lo din chho dan chanchin leh an hnathawh tlangpui te, a report pek naah a tarlang a. Dr. C. Lalremruata, Vice President, MEF chuan lawmthu sawiin programme hi a khar a ni.
Chawhnu lamah a hmun ngaiah vek MEF leh IGNOU Regional Centre, Aizawl te tangkawp chuan Zirna sang zawk chungchangah ‘State Level Seminar on Higher Education in 12th Five Year Plan’ tih thupui hmangin seminar an huaihawt leh a. Seminar chhawngkhatna chu Dr. L. N. Tluanga, Chief Patron, MEF chuan kaihruaiin, Dr. Lalhmasai Chuaungo, President, MEF in ‘Higher Education in 12th Five Year Plan’ tih thupui hmanga paper a chhawpchhuah chu zirho a ni a. Seminar chhawnghnihna chu Pu F. Lallura, Patron MEF chuan kaihruaiin Dr. S. R. Zonunthara, Regional Director, IGNOU Regional Centre, Aizawl in ‘Taking Education to the Doorsteps of All : IGNOU in Mizoram’ tih thupui hmanga paper a buatsaih chu zirho leh a ni.
