2130/2022-2023
Mamit 30th September, 2022 : Pu Lalmalsawma Pachuau, IRS, Secretary, Planning and Programme Implementation Department, Govt. of Mizoram, Aspirational District Programme hnuaia State Prabhari Officer ni bawk chuan vawiin khan Mamit tlawhin DC Conference Hall-ah Aspirational District Programme leh Centrally Sponsored Schemes (CSS) chungchangah meeting neih a ni.

Pu Lalnunhlua, Mamit District Bawrhsap chuan kalkhawmte lawmna thu sawiin hun chep tak kara Mamit District hmasawnna tur ngaipawimawha rawn tlawhtu Pu Lalmalsawma Pachuau chungah lawmthu a sawi bawk.

Pu Lalmalsawma Pachuau chuan Planning & Programme Implementation Department an nih angin kan ram hmasawnna ruhrel kalpui mekte a hmun ngeia kal a, ataka kalpui dan leh harsatna tawhte endik tura lokal an nih thu a sawi a. Project kan siamte tha taka justification siam a, project chu mipui engzatin nge hlawkpui dawn tih leh a area cover tur zat Office dawhkan atang ringawt lova, a hmun ngeia kalchilh a, siam thin turin a chah bawk.

He hunah hian Power point presentation hmangin Pu Isak Lalmuanpuia Chuaungo, Economist-cum-under Secretary, Planning & Programme Implementation Department, Govt. of Mizoram atangin Sustainable Development Goals-a kan District dinhmun thlirho a ni a. Central Sector Schemes bakah Centrally Sponsored Schemes hnuaia India hmarchhak tana 10% Gross Budgetary Support (GBS) hmasawnna project awm thei hrang hrangte thlirho a ni a. Nodal Officer, Aspirational District Programme, Mamit hnen atangin Aspirational District hnuaia hmalakna kal mek, hmalak tawhna leh hmachhawpte thlirho a nih bakah Pu Lalfakzuala, Addl. DC, Mamit hnen atangin sector hrang hranga DC hmalakna-a hmasawnna project an siam leh funding source an thehluhna bakah a status a lem nen a entir a. Sawihona hun tha tak hmanho nghal a ni bawk.

Vawiin vek hian State Prabhari Officer hian DC Circuit House, Mamit, Cold Storage facility site, Govt. Mamit College, khum 100 len theihna tur District Hospital sak mek, UD&PA hnuaia Solid Waste Management Centre Mamit bakah Greater Mamit Water Supply Scheme Part - II, Phaizau-te a tlawh nghal bawk a ni.

Planning Secretary hi MISTIC atangin Scientic Officer leh Research Officer te'n an tawiawm a ni.