2131/2022-2023
Champhai, the 30th September, 2022: Champhai District chhunga zirna tihhmasawn tuma hmalakna kalzelah District Education Committee (DEC) ruahmanna bawhzuiin, DEC member-te chuan a thawhhnih nan vawiin khan Champhai khawpui chhunga zirna in thlanchhuah 12 te an tlawh. Zirtirtute leh zirlaite an kawm a, sikul dinhmunte endikin zirchianna an nei a ni.

District Education Committee Chairman Pu James Lalrinchhana chuan District Education Committee-in zirna tihhmasawn a ngaih pawimawh avanga zirna in hrang hrangte tlawh chhoh mek zel a nih thu sawiin, Champhai khawpui mai nilo district hmun dangte pawh a tahtawla tlawh zel tum a ni, a ti a. Nursery leh KG te chu zirna kalphunga bultanna pawimawh tak a nih thu leh, National Education Policy (NEP) kaltlangin sawrkar sikulah dah vek tum a nih thu a sawi a. District Education Committee zirchianna atanga hmuhchhuahte chu thuneitu sang zawka thlen zel tum a nih thu a sawi a. Zirna kawnga hmasawn turin zirtirtu, zirlai leh nu leh pate inthlahdah lova tanrual a ngaih thu a sawi bawk.

Zirtirtute chu zirlaiten nuam ti taka lehkha an zir theih nana ngaihtuahna senga activities hrang hrang neihpui tur te, training chhuak thlap an nihna leh tawnhriat tha tak tak an neihte hmanga zirlai tam zawk hip tum tur leh intuaithar peih turin a fuih a, mathematics chu Mizo tawng ngeia zirtir thin turin a chah bawk a. Zirlai chauh ni lo, hmasawnna leh thiam thil dangte zirtir nana zirna in te hman a pawimawh thu a sawi a. Zirtirtute chu ruihhlo leh a kaihhnawih hrang hrang laka zirlaite an fihlim theih nana hrilhhretu campaigner ni vek turin a sawm bawk a. Naupangte rilru hriselna dah pawimawh a, an nunphungte chik fo tur leh school drop out nei lo tura tan la turin a fuih bawk.

DEC Chairman chuan zirlaite chu tum mumal tak neia chumi tipuitling thei tura taima taka thawk tur leh hnathawh hreh nei lo turin a fuih a. Hlawhchham chang pawha beidawng mai lova, tum ram thleng tura theihtawp chhuah turin a chah a. Hriatfiahna tak tak neia lehkha zir tur leh ataka hmang tangkai turte, rilru, taksa leh ngaihtuahna hrisel neih tum turtein a fuih bawk.

District Education Committee Monitoring Team Member-te hi team thumah inthenin Champhai khawpui chhunga zirna in 12 te vawiin khan tlawhin an endik a. Monitoring format, zirchianna leh tehfung hrang hrang duan zulzuiin endikna hi an nei a. Endikna hmang hian school chungchang kimchang, thawktu leh zirlai neih dan, SMC/SMDC leh hmasawnna ruhrel leh bungrua; school building, compound, classroom, toilet, tui leh eng, library, computer, kut silfaina leh choka leh adang neih dante an enfiah a. Heng bakah hian academic activities, co-curricular activities, social work leh nutritional garden kalpui dante an enfiah bawk.

Zirlaite hriselna chungchangte pawh sawiho a nih bakah zirlai naupangte nena hun hmanho a ni bawk a. Mid day meal dawn chungchangte, sikul nuam an tih leh tih loh te, hmanraw neih dante leh zirlaite zinga harsatna neite enfiah a ni a. Zirna leh fainate chu kalkawp tlat a nih angin ngaipawimawh turin an chah a. DEC member-ten zirlaite fuihna leh inzirtirna thu tha tak tak an sawi a. Sikul-in hma a sawn theihna turte sawia inrawnkhawmna neih niin, ruihhlo leh a kaihhnawih laka fihlim tura inzirtirna neih nghal zel a ni bawk.

Vawiin Sikul endiknaah hian DEC Monitoring Team-I, Deputy Commisioner Pu James Lalrinchhana kaihhruaiten Govt. Primary School- IV Champhai, Govt. R. Hranga H/S, Govt. Kanan M/S leh Govt. Dinthar P/S te an tlawh a. DEO & DPC, Samagra Shiksha Pu T.T Laltanpuia kaihhruai DEC Monitoring Team-II ten Govt. Venglai M/S, Venglai RMSA Secondary School, Govt. Electric P/S leh Govt. B.M P/S te an tlawh a, Addl. DPC Pu H.Lalhminghlua kaihhruai DEC Monitoring Team-III ten Govt. Tlangsam H/S, Govt. Tlangsam M/S, Govt. Tlangsam P/S -I leh Govt. Tlangsam P/S -II te an tlawh bawk a. DEC Champhai hian kumin July ni 12 a zirna in hrang hrang tlawh thawhkhatna an neih hmang khan sikul 9 an lo tlawh chhuak tawh bawk a. District chhunga zirna in dangte pawh remchan dan ang zela tlawh tum a ni.