2132/2022-2023 

Kolasib dated 30th September 2022: Vawiin chawhnu khan Parish Hall, Venglai Kolasibah Pu K.Lalrinliana, Minister of State, Food, Civil Supplies & Consumer Affairs Department chuan Govt. C.Zakhuma Higher Secondary School Annual Sports Closing Function 2022 chu khuallian niin a hmanpui.

Minister Pu K.Lalriliana chuan Govt. C.Zakhuma Higher Secondary School chu kum 1999 khan zirlai, chhun lam a eizawnna dap ngai si, zir chhunzawm duh si te tan zingkar class hmanga bultan a nih thu sawiin mi inpe tak tak leh zirna ngaisang mite kaltlanga tun dinhmun hi thleng a nih thu a tarlang a. Zirna in belh tlak, result pawh nei tha tak leh zirlai talent nei tha tak tak luh khawmna a ni chho mek chu lawmawm a tih thu sawiin a thawmthat hna pawh kalpui mek zel a nih thu a sawi a. Kum thar a Govt. C.Zakhuma Higher Secondary School tihchangtlun hna thawhzawmna tur hian MLA fund atangin Cheng nuai 5 a ruahman sak tur thu a sawi bawk a ni.

Zirna kawnga hmasawn tur chuan rilru leh taksa hrisel a pawimawh thu sawiin Annual sports chu zirlaite thiam thil haichhuahna hun remchang a nih thu Minister chuan a sawi a. Zirlaite tan hruaitu ni tura inchherna hun te, thuawih tur a inzirtirna hun leh inpawhna leh thawhhona boruak tha siamna hun tangkai tak a nih thu sawiin hlawkthlak tak a hun an hmang thei chu lawmawm a tih thu a sawi a. Tumruhna, taimakna leh teirei peihna neite tan zirnaah hian hlawhtlinna a awm thu a sawi bawk a ni.

Pu Lalnghilhlova Chinzah, Principal, Govt. C.Zakhuma Higher Secondary School chuan kalkhawmte lawmna thu a sawi a, zirlaite atangin hnam lam leh zai hrang hrangte entir niin Pu C.Vanlalzawma, Lecturer chuan lawmthu sawina hun a hmang bawk a ni. Lalbiaksangi, Class 12 hnenah ‘Best Girl’ lawmman hlan a ni a, Lalramkima, Class 11 hnenah ‘Best Boy’ lawmman hlan a ni a. Red House-te hnenah House Champion lawmman hlan an ni bawk a ni.