2133/2022-2023 
Siaha, September ni 30 : Vawiin chawhma dar 11:00Am khan Circuit House Complex-ah Siaha DC Office kum 50  tlin lawmna(Golden Jubilee)  programme  ropui tak hman a ni a. Hon'ble Minister of State for Social Welfare, E&N Deptt etc Dr. K. Beichhua leh 40-Palak A/C bialtu MLA Pu KT. Rokhaw te chuan khuallian leh khualzahawm  niin Golden Jubilee hi an hmanpui bawk a ni.

Rev. Pheitha Lava, Executive Secretary, ECM(H) chuan hunserh hmangin,  Meisavaih East & West MTP Branch ten  Jubilee hawnna hla mawi takin an rem a. Pu Lalsangliana, Deputy Commissioner chuan Jubilee khuhhawnna thuchah sawiin, Golden Jubilee a nang chu lawmawm a ti thu a  sawi a.Golden Jubilee hi thlen zen zen theih a ni lova, mi vannei te chanvo a ni.Chuvangin a lawmna buatsaih hi kan bat ni ve in ka hria a, Siaha district mipui te pawhin min hlutpui thiam hle a, ka lawm tak zet a ni, a ti.

DC's  office,Siaha Golden Jubilee lawmna a khuallian Dr. K. Beichhua chuan Golden Jubilee plaque hawnna leh Jubilee Souvenir tlangzarhna hun a hman hnuin thusawina neih nghalin,Mizorama DC office lo piang hmasa 3 te kha  kan ngaihtuah chian chuan kan Sap Missionary ten Mizorama awmhmun an lo khuarna hmunah vek an ni. Presbyterian Kohhran dintu in Aizawlah, Baptist Kohhran dintu in Lungleiah leh ECM dintu in Saikao(Chhimtuipui)-ah  te an ni hlawm a ni.Chuvangin  DC office,Siaha in kum 50 hmel a lo hmu ta hi, sorkar Pisa pakhatin kum 50 hmel a hmu a ni ringawt  lo, awmze ril tak nei a ni a, Pathian remruat kal zel a nih avangin Siaha mipui tan chuan a hlu bik em em a ni, a ti. Minister chuan Aizawl leh Lunglei DC office ten Golden Jubilee lawmna chang an hriat loh laia, Siaha in ropui taka Golden Jubilee kan han  lawm bik hi kan bawrhsap Pu Lalsangliana leh a staff te thawhrimna vang a ni a, an chungah lawmthu ka sawi tak zet a ni.

Vawiinah hian Siaha khawpui chhunga DC office a awm theih nana an tha leh zung  lo sengtu kan mi  hmasa leh senior politician te chungah lawmthu ka sawi a, a bik takin an in leh lo te DC office sak nana hlantu Meisavaih mipui te chungah pawh lawmthu ka sawi tak zet zet a ni,a ti bawk.

Khualzahawm Pu KT. Rokhaw pawhin thu sawina hmangin, Golden Jubilee lawmnaa khualzahawma sawm a ni chu lawmawm a ti thu sawiin, he Jubilee hi ka hlut em avangin damsam mang lo chungin Aizawl tlang atangin ka lo tlan phei vang vang a ni, a ti.

MTP(H), M.CH.P(H) leh MSO(H)  president theuh ten thuchah tawi sawina hun an hmang hlawm a.Pu S.Hiato Ex-Minister pawhin thu sawina hun hmangin, Siaha DC office lo pianchhuah dan tobul te  a sawi a ni.Pu H.Malvina,CEM,MADC pawhin thu tawi sawina hun a hmang bawk a ni.

MTP Gen. Hqrs, Siaha ten Grand Cultural Dance hmuhnawm tak entirna hun an hmang a, YMA Chhimtuipui Group leh YLA Sub-Hqrs ten hnam lam hmuhnawm tak an entir ve bawk a ni. Programme kar lakah zaithiam tak tak heng - Pu A. Chhualai, Pu John Beizachhi Phuto, Nl. Jesicca B. Khuhly, Nl Jesicca Ngôdy Hlychho te bakah Pu Vanlalhlana ten zaiin mipui kalkhawm te hi an awih a ni.

Khuallian Dr. K. Beichhua chuan Golden Jubilee lawmna puala Siaha town chhunga VC area fai  intihsiakna  lawmman dawngtu  te hnenah lawmman a sem nghal.

1st---Siahatla VC-I te hian citation leh Rs.15,000/- an dawng a
2nd---New Siaha East-I in Citation+Rs.12,000/- an dawng a.
3rd----New Colony VC-III in Citation+Rs.10,000/- an dawng bawk a ni.

Khualzahawm Pu KT. Rokhaw pawhin Siaha DC Office Golden Jubilee lawmna puala buatsaih Marathon Race a lawmman latute hnenah lawmman semna hun hmangin, lawmman latute hnenah hian chawimawina thuziak leh tangkaifai hlan an ni.Lawmman dawngtute:-
Mipa category -ah
1st Prize - T. Malsawmkima, Thosai
2nd Prize - RL. Benjamin, Meisavaih West
3rd Prize - Z. Vabeiryuto, Siahatláh-I

Hmeichhia category-ah
1st Prize - C. Malsawmdawngkimi, Tipa
2nd Prize - ZR. Asopawkirili, New Colony-I
3rd Prize - Malsawmtluangi, College vaih

Pi Rochuangkimi Khenglawt, SDO (S) leh Secretary, Golden Jubilee  Celebration Organising Committee nibawk chuan lawmthu sawina hun a hmang.

Programme khar nan kalkhawm mipuite chuan hlim leh lawm takin Chheihlam leh Awkhypa Lâ hmangin hun an khar ta a ni. Programme zawh hian Siaha DC kum 50 tlin lawmna ruai ropui taka theh nghal a ni.