Vawiin khan Mizoram Legislative Assembly Pariatna thutkhawm hmasaber neih a ni a, MLA thlan tlin tharte lak luhna hun leh Legislative Assembly Speaker thar thlanna hun neih a ni.

MLA thar lak luhna leh Speaker thar thlanna hi Pro-tem Speaker Er. Lalrinawma’n a kaihruai a, Pu Lalrinliana Sailo chu chuhtu awm lovin Speaker a ruat a ni. Pu Lalrinliana Sailo chuan,” Ram zahawmna chu Assembly House a memberte khawsak dan in a hril thui hle”, a ti a, “Mizoram Legislative Assembly rorelna In zahawmna vawng zel turin MLA te ka sawm che u a ni,” a ti bawk.

Chief Minister Pu Zoramthanga, House leader chuan,”India ram chhunga Legislative Assembly House hrang hrangte nen a tehkhin chuan Mizoram chu entawntlak pawl tak a ni,” a ti a, Rorelna In zahawm tak leh rorelna sawt taka kalpui a nih theih nan Speaker leh MLA lakluh thar te tanrualna tha tak hnuaia thawhpuiah a sawm bawk a ni.

Vawiin session ah hian Pu Lalduhawma, Pu Zodintluanga Ralte, Dr BD Chakma leh Pu Lalchamliana ten thu sawiin, eptu MLA te chuan sawrkar thar chu ram tana tha turah chuan theih tawpin an puih tur thu leh thil diklo a kalpui a nih erawh chuan theihtawpin an do dawn tih sawiin, Speaker thar chuan rorelna dik a kalpui ngei an beisei tih an sawi bawk a ni.