Vawiin khan Kolasib DC Conference Hall ah inthlanpui neih zawh tak thlirletna leh nakuma MP Election lo awm tur chungchang ngaituahin Pu Laltanpuia Hnamte, MCS Dy.District Election Officer hoin thutkhawmna neih a ni.

He hunah hian District Level Standing Committee (DLSC) member te chuan inthlanna neih zawh tak chu felfai leh thianghlim an tih thu tarlangin hmun thenkhata BLO thlak ngai bakah polling station ennawn/ siamrem ngai te sawihona neih bawk a ni. Thutkhawmah hian Bilkhawthlir khua a Kharzawl veng a cheng te tan polling Station(p/s) panna a hlat avangin kharzawl vengah polling station siam belh ni se tih rawtna lut chu pawm tlan a ni, Kharzawl primary school chu Kolasib District a Polling Station number 31 na  atan pawm tlan nghal bawk a ni. Heng bakah hian Saiphai p/s tih chu Saiphai 1 tih a thlak turin , New Diakkawn W leh New Diakkawn E p/s hming te chu  New Diakkawn Community hall ti a thlak turin leh Thingthelh a P/s hming chu BNRGSK Building tih a thlak turin rawtna lut te a awm a, hei hi sawiho a nih a nih hnu ah DLSC member te remtihpuina in pawm a ni.

Hemi bakah hian kum 2019 a MP Election lo awm tur a tana inpuahchahna kal chho ah January ni 1 , 2019 a kum 18 tling tur te bakah vote nei thei tura kum tling tawh vote la nei silo te tan Special Summary Revision neih leh tur  ani a, Integrated Draft Electoral Roll hi December ni 28 a chhuah tur ani a, hemi ni atanga Nakum January ni 25 hun chhung hian claims and objections a siam theih anga, claims and Objections lut te chu February ni 11, 2019 hma a chinfel tur niin February ni 22, 2019 ah Final Electoral roll tihchhuah tur  ani.