No.6447/2020-2021

Mamit 5th November, 2020 : Nimin khan Pu Lalrinliana Sailo, Hon'ble Speaker chuan Indo Bangladesh Border Trade Land Custom Station hmun tur Silsury khua tlawhin, a hmun hma turte enfiahin Silsury khawtlang hruaitute leh Bangladesh lama Mizo unau Mahmuam atanga lokalte nen inkawmna tha tak an nei nghal.

Pu Lalrinliana Sailo hian Indo-Bangladesh Border Trade Land Custom Station chu Mizoram mipuite tana tangkai tak anih tur thu sawiin kan ram mamawh chakkhai lakluh nan leh kan ram tharchhuahte hralh chhuahna atana hmun pawimawh tangkai tak a la nih ngei a beisei thu a sawi a. Tunah hian Bangladesh lamah Silsury atanga hla lo te ah tourism nasa taka kalpui mek niin, tourist hmunpuite siam a ni a. Helai hmunah hian trade centre kan siam a, kan in sumdawn tawn theih chuan tourist tam tak kan ramah pawh kan hip theih ngei a beisei thu a sawi bawk.

Pu Lalrintluanga Sailo, Dy. Govt Chief Whip pawhin thusawiin Silsury khua leh Bangladesh inkar khawthlang tuipui kamah hian kan thenawm ram Bangladesh nen mumal taka insumdawn tawn theihna hmun tur Border Trade Centre kan nei theihna turin Commerce and Industries Department kaltlangin sorkar chuan a buaipui mek thu a sawi. Pukzing atanga Silsury kal kawng pawh upgrade-a maintain turin PWD chuan ruahmanna kalpui mek a ni a ti. He border trade hi hlawhtling taka kalpui anih chuan helai tlangdung mipuite'n nasa taka an chhawr tangkai tur niin eizawnna kawngah hmasawnna rahbi pawimawh tak a nih tur thu a sawi bawk.

Insumdawn tawnna kalpuina tur atana Mizoram leh Bangladesh inkar Silsury atanga Chittagong port leh Bangladesh khawpui Dhaka hlat zawng chu hetiang hi a ni.

Silsury - Sajek = 8 km
Sajek -Dighinala = 44 km
Dighinala - Khagrachari = 27km
Khagachari - Rangamati = 72 km
Rangamati - Chittagong = 78 km
Chittagong - Dhaka = 246km.

Speaker Pu Lalrinliana Sailo hi Pu Lalrintluanga Sailo, Dy. Govt. Chief Whip, Pu H.D Lalrintluanga, Addl. Director, Commerce & Industries Deptt, Pu H. Lalramliana BDO, West Phaileng, Pu Ronald Lalchhuanawma Asst. Director Commerce & Industries, Pu Z.D Chenkual, E.E P.W.D, Mamit District, Pu Vanlalvuana, S.D.O, P.W.D West Phaileng Division, Mizoram Legislative Assembly secretariate officials-te leh khawtlang hruaitute'n an tawiawm a ni.