No.6448/2020-2021

Kolasib 5th November 2020: Vawiin chawhma khan Mizoram Journalist Association, Kolasib District-te chuan Mizoram leh Assam ramri buaina avanga lirthei tangkhang te, nitin mamawh hrang hrang a Mizoram dinhmun leh hmalakna kalpui dan chungchangah Dr. H.Lalthlangliana, Deputy Commissioner, Kolasib district an kawm.

Dr.H.Lalthlangliana chuan ramria buaina avanga nitin mamawh phurtu lirthei za chuang Kolasib leh Vairengte inkarah ding an awm thu sawiin Kolasib district chhungah ei leh bar a harsatna a awm loh nan midang inngaichang chung a khawsak thiam a tul thu a sawi a, tun thlenga khawtlangah mahni mamawh bak lei/chhek khawl (Panic buying) an awm lo nia a hriat thu a sawi. Kolasib DC chuan ramri chungchanga hmalaknaah sawrkar leh pawl hrang hrangte thawhho a pawimawh thu sawiin,” Ramri thil a harsatna kan hmachhawn mek ah hian eng pawl mah kal fal awm lova, hmalakna rual khai tak a kan kalpui a tul a ni,” a ti.

Ramri kan buaipui chhung hian hrileng lak a fimkhurna kalpui a pawimawhzia mipuiin an theihnghilh palh a hlauhawm thu sawiin hemi kawng a inzirtirna hi khauh lehzual a kalpui a tul thu DC chuan a sawi bawk a ni.

Kolasib DC chuan BSF Company pathum chu Kolasib district-a awm turin ruahmanna a kal mek thu a sawi a, Kolasib khaw chhung hmun hnihah leh Bilkhawthlirah dah an ni ang a, CRPF-te hi Vairengteah an awm mek bawk a ni. DC chuan heng hmunte hi Quarantine Facilities ang chiah a enkawl tur a nih thu leh test-te pawh kalpui hmasak vek tur a nih thu a sawi a, mipuite ralkhel lo turin a ngen nghal bawk a ni.