Environment & Forests Minister Pu Lalrinmawia Ralte chu 15th Delhi Sustainable Development Summit 2015, New Delhi-ah Chief Minister aiawhin a tel. He summit hi February ni 5-7 khan neih a ni a. Climate change chungchang buaipuitu khawvel ram hrang hrang atangin ram hruaitu leh mithiam tel an tha hnem hle. He summit-ah hian special session on tackling climate change by legislators - the road to Paris, 2015 chu British Dy. Prime Minister hlui leh House of Lords-a member ni lai Lord John Prescott-in a kaihruai a, heta an thurel pawimawh zingah kumin kum tawp lama Paris-a ram hrang hrang-in climate change tihziaawmna tura inremna ziah tur chungchangte a tel a ni.

Environment & Forests Minister Pu Lalrinmawia Ralte hi South Korean Ambassador Lee nen February ni 9 khan Mizoram House-ah inkawmin Korea leh Mizoram chungchang thil tam tak an sawi dun a. Minister chuan inhmuh a duh chhan sawiin Mizoram leh South korea hi kawng hrang hrangah inlaichinna tha tak siama thawhdun a duh thu a sawi a, Korea chu Japan-in kum 1910-1945 chhung, kum 35 zet a awp beh chhungin ram buai an ni a. Mizoram pawh kum 20 chuang zet rambuai a nih ve tho thu te, kum 1950-1953 chhung Korean war-ah mi nuai 8 zet an boral leh hnu pawha General Park Chung Hee kaihhruaia Skill Development hmanga an ram a lo changkan tak dante chu a ngaihsan thu leh, Mizoram Sorkar pawhin Skill Development a kalpui ve mek thute a sawi a. A bik takin mau sawngbawlna lamah te thawhho a rawt a, Aizawl leh Seol khawpuite chu englai pawha intlawhpawha inchhim tawn turin 'Sister City Twinning' neih ni se tih rawtna te ziakin a thlen a ni. Minister chuan Korean Ambassador hi remchang hmasa berah Mizoram rawn tlawh turin a sawm a. A sawmna chu tihhlawhtlin ngei a tum thu sawiin, ani pawhin Korea ram tlawh ngei turin a sawm ve bawk a ni.

Minister hi Pu Ranbir Singh, IAS, Res. Commr. Pu Zothankhuma, IAS, Secretary, Industries leh Pu Umakant, IFS, OSD to Govt. of Mizoram te'n an tawiawm a ni.