Mizoram Cooperative Apex Bank Ltd. chuan vawiin khan General Assembly vawi 22-na chu Aizawl Vanapa Hall-ah an hmang a. Cooperation Minister Pu Lalrinmawia Ralte chu khuallian a ni.

Pu Lalrinmawia Ralte chuan Mizote hi cooperative movement dungthulin kan khawtlang nun leh sakhua inrelbawlna kawngah hlawhtling taka hna kan thawh theih laiin keimahni hlawkna tur, economic development lam hawia cooperative society a hna kan thawhin harsatna kan tawk leh thin hi inbihchian kan ngai hle a ni, a ti. Mizo zingah cooperative society awmzia hrilhfiah ngai an la tam hle a, a hriate hian a hrilhfiah kawngah mawhphurhna kan nei a ni tiin cooperative movement thatna pudarh tur zawngin mahni awmhmun theuha tang turin kalkhawmte a sawm a. Inpawh tlang tak leh inlungrual taka mahni society tana tang turin a ngen a ni. Minister chuan Apex Bank a thawktute fuihin than duh luat avanga sum leh paia bank himna (financial security) ngaihtuahlo leka hmanhmawh lo tura fuihin Bank lianpui balance sheet tawp tak nei ai chuan bank te zawk, balance sheet felfai tak neite an ropui zawk, a ti.

Cooperation Department Secretary Pu Jack L.Darkim pawhin thu sawiin thawhhona a ni tih hre lova mahni hmasial leh mi dangte aia lansarh bik tumte hi cooperative society-te thanmawh bawk an ni, a ti a. Cooperative Movement chu mahni ta anga thahnemngai taka thawk chunga a huho hmalakna, team work a ni tih hrereng turin kal khawm te a chah a ni. Apex Bank chu Cooperative movement thanlenna tura pawimawh ber pakhat a ni tiin private bank changtlung zawk nia lang te el pha khawpa thangin, tunlai thiamna hmanga changtlung taka an kal thei chu lawmawm a ti a, mahni hlawkna chauh ngaihtuah lova Mizo mipuite hmasawnna atana hna thawktu Apex Bank chu dawr sauh sauh turin Secretary chuan mipuite a sawm a ni.

Mizoram Cooperative Apex Bank Ltd. hi Assam Cooperative Societies Act (As extended to Mizoram) 1949 angin register a ni a. July 31, 1982 ah kha tih laia Chief Minister Brig.T. Sailova hovin hawn a ni. Tunah hian kum 33 a upa niin Board of Directors mi 11 kaihhruaina hnuaiah thawktuten Branch 13 an enkawl mek a. Aizawl khawpui chhung bakah District Capital zawng zawngah Branch a awm vek a ni.

He Bank hi CBS platform ah hlan kai niin Head Office leh Branch zawng zawng computerized a ni a. ATM Card pawh hei hian a keng tel nghal. Internet leh mobile banking thlengin a hman theih tawh a ni. Customer ten an document, in hmun lo ram pass, LSC, thurochhiah leh lehkha pawimawh hrang hrang bakah bungraw hlu, incheina, rangkachak leh lunghlu te, him taka an dah theih nan Safe Deposit Locker pawh a nei tawh nghe nghe.

Vawiin hian Assembly nilengin an hmang a, an Chairman Pi T.Lalmuanpuiin a kaihruai a ni. Mizoram hmun hrang hrang atangin shareholders thahnem tak an tel a ni.