Nimin ni 30. 3.2015 khan Pu Lalrinmawia Ralte, Minister Environment & Forest hovin New Eden, Mamit District ami chu kawngpui sialna tur ram chhunga In awmte a hmunah enho a ni.

New Eden khua a In(building) NH-44A kawngpui sialna turin a paltlang tur te chu an insawn thuai theih nan New Eden VC ten insawnna hmun tura an ruahman an khaw piah Tlang bawk Langkaih lui bul chu enho a ni a, Minister chuan amah lo hmuaktu khawtlang hruaitute leh mipuite hmaah chuan kawngpui tha neih hi a hlu em em a, hmasawnna tam tak New Eden tan hian a rawn thlen dawn avangin a rang thei ang bera in sawn hi a tha a ni a ti a. An khawtlang mamawh leh harsatna an lo thlen te ngaihthlak sakin a theih ang a bawhzui tur a tih a ni.

Pu Vanlalngaihsaka, DC Mamit pawhin thusawiin New Eden khua chu in vannei hle a ni tiin, sorkar hian a ngaihsak em em che u a, compensation lak tawhna te hi pek nawn theih a a nih tawh loh avangin insawn turte hi tanpuina awm thei tur te dap pui mek an ni tiin compensation leh award dang dawng tawh te chu in sawn thuai turin a hriattir.

New Eden a tlawh hnu hian a bial chhung khua Tumpanglui leh Tuidam khua te tlawh leh in khawtlang hruaituten an lo hmuak a. Khawtlang hruaitute nen an mamawh hrang hrang an thlirho a ni.

Minister hi a nupui Pi Lalthanzami leh Pi Lalbiaksangi, Addl. DC, Mamit, Pu B. Lalchhawntluanga SDO (civil), bakah a kaihhnawih PWD(Highway), Environment & Forest Department ten an tawiawm a ni.