Vawiin chawhma dar 11 khan Pu H Rohluna Minister of Industries in Assembly Building Annex-II ah KVIC, Ministry of MSME te bultuma buatsaih State Level PMGP( Prime Minister’s Employment Generation Programme) Exibition a hawng. Trainees pass chhuak te hnenah Certificates a sem nghal bawk a ni.
Thusawiin khuallian Pu H Rohluna chuan Industries leh KVIC te hmalak puina avanga hlawhtling mi tam tak in an thiamthil zir chhuahte eizawn nan an hmang tawh in tunah training zo thar certificates semna hun buatsaih a ni chho zel chu lawmthu sawiin hmalak tur leh hmasawnna tur erawh a la tam a ni a ti a. Tunah hian Mizoram ah kut hnathawk tu leh thiam thil nei te tan kawl a eng tan in hlawhtlinna kan hmu mek a, chutih laiin tan han la tak tak tur in mamawh tam tak kawlphetha, kawngpui leh tui te duhthusam in kan la nei loh avangin duh anga Industries lamah hmasawn na a kal chak thei lo chung pawha hetiang lama hmasawnna duhawm tak tak kumin Chapchar Kut ah te phochhuah theiha a awm te, siam chhuah leh tharchhuah hmuh tur a awm ta te chu chhuanawm a tih thu a sawi a. Bank kaltlanga loan la thin an nih avang in bank lakah pawh rintlak leh rinawm nih a ngaih thu sawiin Minister chuan Mizoram chhung chauh ni lo state pawn lam el pha tura tan la tur leh thiamna tak tak nei tura training ngaih pawimawh a tul thu sawiin sumdawnna leh workshop i lo vel ah pawh a neitu ngei in a thiam chuan a hlawk bik in a mi chhawrte a endikpui thei thin dawn a, Ei leh In siam leh zawrh te chu a quality a that a ngaih bakah a siamtu te ngeiin an ei in ngam ngei chu zawrh nise a ti a. Sumdawnna lamah pawh Sorkar-in nasa taka hma la chho zel in Mizoram chhung mai ni lovin International boundary pelin khawchhak lamah Zokhawthar ah sumdawnna tur a bun chho mek a, chutih laiin chhim lamah Zorinpui, khawthlang lamah Kawrpui chhuah pel in sumdawnna ah hma a la mek a ni tiin taimak na leh rinawmna nena thawk chhunzawm zel tur in kalkhawm te chu Pu H Rohluna chuan a sawm a ni.
Exhibition hawn inkhawm kaihruaitu Pu K Lianzuala,Chairman MKVIB chuan PMEGP chu an hnathawh pui ber ani tiin tun tumah hian thiamthil hrang hrang zawrhna dawr 27 hawn a nih avangin lawmthu a sawi a, MDTC ( Multidisciplinary Training Centre) Zemabawk-ah zirlai an neih reng thin thu leh an kalphungte a sawi bawk. Pu Kaisangzuala, CEO, MKVIB in vawiin programme leh PMEGP chungchang sawi hawnna a neih bakah Pu Lalthuamliana Regional Manager, State Bank of India leh Pu H Thangmawia, General Manager, Directorate of Industries ten thu tawi an sawi a, Pi Rualkhumi, Director, KVIC in kalkhawmte hnenah lawmthu a sawi a ni.
PMEGP Exhibition hian tun kar chhung a awh anga, dawr hrang hranga thiam thil ilo phochhuah te chu lei theih tura zawrh nghal an ni.
PMEGP hian a tum ber chu hnathawh tur nei lo ( Unemployed) ten mahni eizawnna tur an neih theihna tura hmalak pui a ni. Condition fel tak neiin loan Rs 25.00 lakh thleng dil theih a ni.
