Pu Lalrinmawia Ralte, Labour, Employment & Industrial Training Minister chuan vawiin khan Synod Multipurpose Training Centre, Mission Vengthlang-ah Certificate in Computer Application Course (17th Batch) zir zo te thlahna inkhawm hmanpuiin Certificate a hlan. Inkhawm hi Rev. Vansawma, Programme Director, SMTC in a kaihruai a ni.

Pu Lalrinmawia chuan Skill Development hi Mizoram sawrkar in a ngai pawimawha, thalai sang chuang zet te pawh training pek an nih hnu ah phai lamah hna te an thawk mek a ni a ti a. Zirlaite chuan an zir bikah thiamna tak tak rawih tlak thiamna an neih chuan hna in a zawng thin a ni tiin, zirlaite chu an thil zirah an rilru pe tlat turin a fuih. Sawrkar leh Kohhran ten hna zahawm thawk tura hma an lak mek laiin thalai thenkhat ramdanga hahdam deuha hnathawh tur awm anga ngai a an kalna tur zirchiang lova kalte zingah harsatna tawk an awm thin hi pawi a tih thu sawiin Minister chuan thlalaite chu an ramdanga an hnathawhna tur te zirchiang hmasa turin a chah a ni.

SMTC hi January, 1996 khan tan a ni a, helai hmunah hian thalai rualten mahni kuta eizawnna kawng an lo neih ve theihna turin training chi hrang hrang tailoring, shoe making leh CCA ah zirtirna an pe thin a. Tunah hian zirlai 86 awm in, vawiin khan CCA zir zo mi 18 hnenah certificate hi hlan an ni.