Pu Lalrinmawia Ralte, LE&IT Minister chuan vawiin khan Mission Foundation Movement leh North East Rural Livelihood Programme (NERLP) tangkawp buatsaih mi 30 tan a thlawna Mistiri training na thla thum course chu vawiin khan MFM Life Skill Training Centre, Bawngkawn-ah a hawng.

Minister chuan Mistiri training zirte chu midangte zirtir chhawng leh thei khawpa an thil zirah thahnem ngai taka zir turin a chah a, kan ramin Mistiri hi kan la mamawh zel dawn a, chuvangin an thil zir chu an thiamna bakah quality lam ngai pawimawh turin a chah a. Minister chuan Mizoram atanga hnathawk tura tirhchhuahte hi a tlangpuiin an hnathawhah an fel in an hawihhawm a, Mizo hmingte pawh an ti tha thin a ni a ti.

Pu Reuben Ranglong, District Project Manager, NERLP, Ministry of DoNER chu khual zahawm niin NERLP hnathawh dan tlangpui sawina hun a hmang a. He training hi NERLP bultumin April, 2016 thla tir atang khan tan a ni a, training te hi Aizawl District chhung thingtlang khaw 7 atanga lokal khawmin a thlawn vek a training pek an ni ang a, an zir zawhah an thawhna tur zawnpui an ni dawn bawk a ni.

Kum 2012 - 2014 chhung khan MFM hian LE&IT Department leh CYMA te nen tangkawpin mi 244 an lo train chhuak tawh a ni.