Vawiin khanLt.Col(Retd.) Z.S Zuala, Parliamentary Secretary, Rural Development kaihhruai na in Secretariat Conference Hall, New Capital Complex ah State Employment Guarantee Council (SEGC) meeting pawimawh tak neih a ni a. MGNREGA hmalakna leh hmalakna tur hrang hrang te sawiho a niin he mi in a kaihhnawih Aizawl leh District lam atangin member te an kal tha hle.
Meeting kaihruaitu Pu Z.S. Zuala chuan MGNREGA hnuaia mipui leh khawtlang tana tha tur hnathawh hrang hrang te a sawifiah a, ni za inhlawhna tur atana sum lo kal, hun tep ter leh hmanhmawh thlak ah te Planning leh Finance Department a hotu ten hrethiamin chak taka an lo bawhzui pui thin na ah lawmthu a sawi. Heng hnathawhna tur sum te hi Central lam atanga lo kal an nih avang leh hmanhmawh ngai chi a nih bawk thin avanga hun dangah pawh ngaihpawimawh sak thinturina ngen nghal a ni.
Pu Lalhmingthanga IAS, Secretary, RD Department chuan Agenda hmasa lama thudah leh hmalak tawh dan report a pe a. PWD Schedule of Rate (SOR )hi MGNREGA hnathawh thenkhat ah a rate a inang lovin hman tawm a remchang thei lova, chumi avang chuan Terrace leh Dil huan siam nan bik a SOR chu siam anih tawh thu a sawi a. MGNREGA a thawktu staff te hlawh tur Rs.1056.46 lakhs (SMS) pawh chinfel a nih tawh in sem fel anih thu a sawi bawk.
Meeting-ah hian MGNREGA hnuaia hnathawh hrang hrangte sawikhawm in Aizawl leh District hrang hrang ami ten an hnathawh dan report an pe bawk a. Job Card chungchanga bank nena indawrna a harsatna awm thin sutkian dan tur te, Adhaar Card te leh thil dang tam tak sawi ho a ni a. RD department a hotute bakah MGNREGA hnuaia Line Department hrang hrang - PWD, PHE, ICDS, Forest, Agriculture, Sericulture, Soil & Water Conservation, Fisheries leh Horticulture te an tel a ni.
SEGC hi MGNREGA hmalakna tur hrang hranga state sorkar thurawn petu sang ber a ni a. MGNREGA hnuaia hnathawh hrang hrangte endik a, siamthat ngai lai te siamtha tura thurawn petu a niin state chhunga hmalakna te puangzartu ber a ni. Central atanga sum lokalte district thuneitute hnena semdarhin an sum hman dan te a tul hunah a endik a. Heng bakah hian central sorkar-in tih tur an rawn ruahman sak te a ti bawk thin.
