Lalrinmawia Ralte, MLA Hachhek Constituency, Political Adviser to CM chuan a bial chhung khua fang mekin bial chhung khawtin te'n an mamawh Oxygen Concentration chu a sem nghal a ni.

Pu Lalrinmawia Ralte, chuan Sawrkar duhsakna a zarah bial chhung hmasawnna kawng hrang hrang thawh a ni chu lawmawm a tih thu a sawi a, mipuite pawhin  hmasawnna hmel kan hmuhte chu zirchianna chang hre turin a chah bawk. Bial chhungah kawngpui KDZKT Road leh NH 44A sial hna thawh nan leh Zawlpui leh Kawngpui hrang hrang atan Vaibelchhe 300 lai hman a ni a ti. Kan bial chhunga hmasawnna hna thawh hrang hrangte chu tangkai taka chhawrtu ni turin duhsakna a hlan bawk a ni.
Bialtu MLA chuan bial chhung thalaite chu zirna lamah tun aia nasa lehzuala tan la tura chahin, zirna hi changkanna kawng kan zawhna tura pawimawh ber a ni a ti.

Zawlnuam khua leh a chhehvelte tana Oxygen leh thildang semna hun inkhawm tawi hi Pu Lalnunfela, BDO Chawngthu chuan a kaihruai a, vawiin vek hian Recreation Hall, Kawrthah-ah Kawrthah leh a chhehvel khuate tana Oxygen Concentration semna hun Pu Johny K. Zonunsanga, Secretary, Taitesena Group YMA kaihruaina-in neih a ni bawk.

Bial chhung khaw 33-a sem tak Oxygen Concentration chu mipui a mamawh tute'n tangkai taka an hman turin khawtlang hruaite kutah hlan an ni a. Hei bakah hian Zawlnuam, Kawrthah leh Kawrtethawveng Public Health Centre /Community Health Centre-te tan Oxygen siamchhuahna tur backup a pe bawk. Heng bakah hian Bial chhung YMA Branch leh School-a hman turin a mamawh zualte tan Computer Set 7 leh Printer sem a ni bawk a. YMA branch hrang hrang ten rikrum thila an hman tur Silpouline a pek bakah PA set bial chhung YMA Branch te'n tangkai taka an hman a tan a sem nghal bawk a ni.

Bialtu MLA Pu Lalrinmawia Ralte, Hachhek Constituency hi bial mipuite'n amah lawmna thilpek an lo pe hlawm a ni.