Vawiin khan Health Minister Pu Lal Thanzara chu World Day of the Deaf hmanna-ah khuallian niin; Assembly Annexe, Treasury Square, Aizawl-ah hman a ni a. Dr. Lalrozama, IAS, Mission Director, NHM chuan he hun hi a kaihruai a ni.
Minister Pu Lal Thanzara chuan ni pawimawh tak ‘World Day of the Deaf’ hmang tura lokal zawng zawngte hnenah lawmthu a sawi a. Kumin thupui ‘Zaizir nen chuan kan vaiin kan tel tlang vek thei a ni’ tih hian, a kentel pawimawh tak chu Zaizir, Sign Language zir thiam hi a ni, a ti a. Zaizir, Sign Language hman tangkai a nih phawt chuan, beng lama harsatna neite pawh engkimah tel ve theiin, benglama harsatna nei lote tih ang chu buaina awm miahloin an ti vek thei dawn tihna a ni, a ti a. Sawrkar pawhin beng ri hriatna lama harsatna hi ngai pawimawhin, National Health Mission hnuaiah Kum 2014 khan, National Programme for Prevention and Control of Deafness (NPPCD) a din a, NPPCD kal tlangin District Hospital hrang hrangah Medical Officer, Audiologist, Audiometric Assistant te leh Hearing Instructor te dah a ni, a ti bawk a. Hei bakah hian beng enkawlna dah niin, Kum 2017-18 chhungin mi 2439 lai Bengri hriatna tha lo hmuhchhuah a ni, tiin a sawi a. Khuallian chuan Bengri hriatna tha lo nei leh, inringhlelte chuan Sawrkarin inenkawlna a dahte hi hmang tangkaia, doctor hnena inentir uar deuh deuh turin mipuite a ngen a ni. Nausen pianghlim beng ri hriatna that leh that loh enna khawl Brainstem Evoked Response Audiometry (BERA) neih a lo ni ta chu lawmawm a ti bawk a ni.
Minister chuan ‘Certificate Course on Evidence Based Management of Diabetes’ zir chhuak Doctor 17 te hnenah Certificate hlanna a nei a. He hunah hian Pi Lalrinfeli, Audiologist chuan Zaizir, Sign Language pawimawhna PowerPoint Presentation a pe a. Deaf School of Mizoram leh Redeem Garden Naupangte chuan Special Item neiin, hriatna lama harsatna nei mi 50 hnenah Hearing Aid pek an ni bawk a ni.
He hun hi National Programme for Prevention and Control of Deafness (NPPCD) leh National Health Mission, Mizoram & NERC-NILD, Mizoram te buatsaih a ni a; Health & Family Welfare Department-a thawktute leh midang tha hnem tak an tel a ni.
