Vawiin hian Pi Vanlalawmpuii Chawngthu, Minister of State, Sericulture etc. leh Hrangturzo Bialtu ni bawk chuan Govt. Bungtlang High School kum 50-na (Golden Jubilee) champha lawmna khuallian niin a hmanpui.

Khuallian chuan lalna leh thuneihna te, sum leh ropuina te hi ral leh mai thei leh inlaksak mai theih ani a, thiamna erawh inlaksak theih a ni ve lova, a hlu bik em em a ni, a ti. Zirlai ni ringawt lovin zirlai hlawhtling leh hmantlak, thiamna tak tak nei ni tura tan lak kan ngaih thusawiin, hnam dangte chim rala kan awm loh nan kan thalaite, zirtirtute leh zirlaiten thuk takin mawh kan phur a ni, a ti a. Zirna kawnga hlawhtlin tum mi harsa zawkte sawrkarin tanpuina kawng a ngaihtuah sak thin a, kawng dangah pawh thalaite hmasawnna tur min ngaihtuah sak tur hian sawrkar hi a inhuam em em thin bawk  ani, a ti a ni.

Jubillee lawmna hi Pu P.C. Saizinga, VCP Bungtlang in a kaihruai a, Pu C. Remsanga, Headmaster, Govt. Bungtlang High School-in Bungtlang High School lo din chhoh dan report kimchang pein, Pu Lawmawma, DEO Serchhip in thusawina hun a hmang bawk. School naupang ten items hmuhnawm tak tak an entir a, tlai lamah Jubilee ruai kil ho a ni.