Pu Lalrinmawia Ralte, Parliamentary Secretary, Home, RD etc. chuan ni 6 chhhungin a bialchhung khaw hrang hrang khaw sarih-a BNRGSK Buildings Kawrtethawveng Rs. 9,66,000/- senna te, Tuidam Rs. 8,78,000/- senna te, Rengdil Rs. 8,78,000/- senna te, Hriphaw Rs. 6,92,000/- senna te, Bungthuam Rs 9,66,000/- senna te, Kanhmun Rs. 9,66,000/- senna te leh Zawlnuam ( Block Centre) Rs 21,00,000/- senga sakte a hawng.

Heng khuate a BNRGSK Building sak hawnna-ah thusawiin Pu Lalrinmawia Ralte chuan sawrkarin khawtlang inrelna tha a awm theihna turin nasa takin hma a la a ni ti a, sawrkar hmalakna a hnathawktu hrang hrang te sawrkar hnathawk kan ni emaw Contractor kan ni emaw kan hnathawhna theuhah a tha zawng miten min hriatreng theihna turin kan hnathawhna ah dik tak leh fel takin kan thawk thin tur a ni a ti. Heng Building thar hawn takte pawh hi khawtlang tana inrelbawlna tha a awm theih nan leh khawtlang tana thil tha relna hmun a nih theih nana tangkai taka hmang turin mipuite a chah a, sawrkar buildingte tha taka a awm reng theih nana hma la tur leh mahni ta anga enkawl theuh turin mitinte a sawm bawk a ni.

Pu Lalrinmawia Ralte hian ni 15th May 2012 (thawhlehni) khan Zawlnuam Welfare Committeee, Aizawl buatsaih a Zirlai hlawhtlingte lawmna hun, Zawlnuam Community Hall-a neih chu khuallian niin a hmanpui a, Zirlai hnenah thuchah sawiin hlawhtlinna hi tumruhna leh tihtakzetna-ah a in nghat a ni tiin tuna zirlai hlawhtling te pawh chutiang mi chu in nih avangin ka lawmpui takzet che u a ni a ti a, An zir leh zelna turah pawh theihtawp chhuaha tan la zui turin a chah bawk. Khuallian Pu Lalrinmawia Ralte leh a thiannu, Pi Lalthanzami ten lawmpuina thilpek(Citation) an sem a ni.

Pu Lalrinmawia Ralte hian a bialchhung khaw hrang hrangte tlawhchhuak vekin khawtin-ah kumin 2012 a HSSLC leh HSLC a zirlai hlawhtlingte hnenah Dictionary a hlan vek bawk a ni.

Pu Lalrinmawia Ralte hi a thiannu, Pi Lalthanzami, Pu Lalramliana SE Project Circle-I P&E, Pu Laldela Sailo SE, PWD, Dr C. Lalzarliana Director, Agricultural, Pu David H. Lalthangliana OSD Home, leh Officials engemawzatin an tawiawm a ni.