Nizan khan Kanan Br. YMA chuan an Br. YMA din champha vawi 36 na kharna inkhawm Kanan veng Community Hall ah nei in, he inkhawm ah hian Pu Lalrinmawia Ralte, Parliamentary Secretary leh an Br. Patron ni bawk chu khuallian a ni.

Khuallian Pu Lalrinmawia Ralte chuan thu sawi in Mizo thalaiten eng thil pawh ti dawn ila a hmun leh a hun hriat a pawimawh thu leh lehkhathiam tamna ram kan nih anga intihhlimna te pawh hi fel fai tak a hmang thin turin member te a chah a. A sawi zelna ah Khuallian chuan Mizo nunzemawi Tlawmngaihna chhawm nung zel turin member te a fuih a, Khawhar hla te hi hi kan vawn nun zel a pawimawh thu sawiin Harhna in a rawn ken Khawhar hla te hi kan hnam ze dik tak leh kan nihna tichiangtu anih avangin YMA te hian kan humhalh tlat tur a ni a ti a. Tun thleng a Kanan Br. YMA in Mitthi lumen zan a Solfa tello khawhar hla hmanga hun an la hmang tluantling thei chu fakawm a tih rualin chhawmnung zual zel turin a fuih bawk.

Kanan Br. YMA hian Oct. ni 10 atanga ni 12 chhung khan Sport item hrang hrang Football, Volleyball, TT, Arm Wrestling leh Mizo infiamna Kalchet kal, inkawibah, insuknawr, insaihruipawh hmangte in Kanan veng thler hrang hrang; Upper Kanan, Middle Kanan, Lower Kanan, South Kanan angin inelna an buatsaih a. Oct. ni 13 zanah YMA Chhang Nite hlawhtling takin an buatsaih a. Oct. ni 15 zingah Presbyterian Hospital, Durtlang a hman atan YMA member tlawmngai ten Thisen unit 55 an pe. Hemi zan vek hian zai intihsiakna hlimawm tak neih a ni a veng mipui ten an hlut hle a ni.

Oct. ni 16 Rising day zingkar atangin Community Hall ah Health Dept.Ayush prog hnuaiah Free Clinic neih a ni a. He free clinic ah hian vengchhung mi thahnem tak inentir in veng mipuite an lawm tak zet zet a ni. Chawhnu dar 1:30 ah Rising Day vawi 36na lawmna pui ber vantlang inkhawm neih a ni a, he inkhawm hi Br. President Pu Thangzikan kaihruai in CYMA President Pu JH Zoremthangan lawmpuina leh fuihna thuchah a sawi a, Organising Secretary Pu PC Rozamlianan report kimchang tak a pe a. Kanan Br. YMA President lo ni tawh ten Darkhuang vawi 36 vuakna hun an hmang a. Kanan veng VC, MUP, MHIP ten Special Programme hmangin Kanan veng chhunga School hrang hrang naupang ten item hmuhnawm leh bengvarthlak tak tak an entir a, tlaiah lawmna Ruai khawtlang huapin an theh.

Oct. ni 16 zan vek hian Rising Day Prog, kharna inkhawm Community Hall ah hian neih chhunzawm leh a ni a. He inkhawm hi Pu Laldawngliana Tochhawng, Vice President in a kaihruai a ni.

He inkhawmah hian Sport leh Singing Competition a inelna result puan leh lawmman semna hun hman a ni a. A pumpuia Champion chu Middle Kanan ni in Upper Kanan, Lower leh South Kanan ten an dawt a ni. Heng lawmman te hi Khuallian hian a sem nghal a. Member tlawmngaia thisen pe mi 55 te hnenah Chawimawina certificate hlan a ni bawk.